Apertura do prazo de inscrición para os cursos do programa “Fórmate Ferrol”

A concelleira de Xuventude do Concello de Ferrol, Verónica Casal Míguez, informou esta mañá sobre dous programas dirixidos á mocidade ferrolá: o proxecto “Conecta Ferrol” de axudar para mercar un ordenador e a iniciativa “Fórmate Ferrol” integrada por diferentes cursos enfocados ás novas tecnoloxías e a busca de emprego.

Así, un total de 77 solicitudes foron presentadas ao “Conecta Ferrol”, das que 9 foron denegadas -8 por superar os ingresos permitidos e unha por ser presentada fora de prazo- e 18 se atopan en lista de espera. O número de achegas concedidas é de 50, pero se algún estudantes renuncia á mesma entrarán a ser beneficiarios os da lista de espera. A contía da axuda é de 200 euros por mozo e o ordenador deberá ser adquirido nunha tenda ou comercio de Ferrol ata o 30 de novembro.

Por outra banda, a edil de Xuventude indicou que mañá será aberto o prazo de inscrición para o programa “Fórmate Ferrol” e que está vixente ata o vindeiro xoves, día 14. Esta iniciativa inclúe os seguintes cursos de 20 horas cada un: posicionamento en redes sociais; posicionamento SEO; iniciación á programación web; community manager; medir campañas nas redes sociais; mellores aplicacións para a empresa; como converter visitas en clientes; retoque fotográfico; fotografía dixital; xestión de proxectos dixitais; video: montaxe e edición; desenvolvemento móbil: android e multiplataforma; ferramentas de software libre; descargas na rede. “Fórmate Ferrol” complétase cos obradoiros de 16 horas de duración de web móbil;  inicio ao cloud computing; e preparación do currículo vitae e  da entrevista de traballo. O número de prazas por curso é de 12 persoas e todos son de carácter gratuíto.

Casa da Xuventude

“Fórmate Ferrol” desenvolverase na Casa da Xuventude do 18 de novembro ao 29 de maio de 2014, en horario de mañá e tarde, e está dirixido aos mozos e mozas entre 16 e 30 anos que se atopen empadroados no termo municipal. Os interesados en participar deberán presentar a súa solicitude no Rexistro Xeral do Concello de Ferrol e poderán inscribirse nun total de seis cursos por persoa.

A acción formativa de posicionamento en redes sociais será o primeiro en dar comezo, que en previsto o seu inicio o vindeiro 18 de novembro. A edil Verónica Casal sinalou que o obxectivo deste programa “é seguir formando á xuventude nas novas tecnoloxías e na busca de emprego a través delas, ademais de implicar á mocidade ferrolá na Casa de Xuventude”. Para máis información, os interesados poderán consultar a páxina web municipal: www.ferrol.es ou a páxina da área de Xuventude na rede social Facebook: www.facebook.com/ferrolxuventude.