Aberto o prazo en Monforte para inscribirse no programa “Xuntos polo Nadal”

A concellería de Benestar Social, dirixida por Pilar López, informa que a Secretaría Xeral de Política Social convoca  prazas para acceder ó Programa  Xuntos Polo Nadal.

O programa vai dirixido a aquelas persoas maiores que se atopan nunha situación de soidade, ben pola carencia de familiares, perda do seu cónxuxe ou a emancipación dos fillos e fillas.

Este programa desenvolverase nas datas comprendidas entre o 23 de decembro de 2013 e o 2 de xaneiro de 2014, contemplando o aloxamento en habitacións compartidas e manutención en réxime de pensión completa durante 11 días (10 noites), que se computarán desde o momento de saída do lugar de orixe ata o momento da saída do centro no que se leva a cabo.

Para ser beneficiario deste programa haberá que reunir os seguintes requisitos:

-Ser maior de 65 anos.

-Residir na Comunidade Autónoma de Galicia.

-Valerse por si mesmo e non padecer enfermidade infecto-contaxiosa activa nin trastornos mentais ou condutuais que poidan alterar a convivencia.

-Non estar acollido en ningún centro residencial.

-Ter que pasar só/a as datas do Nadal.

Para a selección dos participantes daráselle preferencia ás persoas que:

-Realmente vivan soas e non teñan con quen pasar estas datas.

-Teñan un menor nivel de ingresos económicos.

-Non participaran este ano en ningunha quenda do Programa de Benestar en Balnearios, nin en pasadas edicións do Programa Xuntos polo Nadal.

-Teñan máis idade.

As solicitudes deberán presentarse nos servizos sociais comunitarios do concello, sito na rúa Ricardo Quiroga s/n,  ata o día 25 de novembro, data na que finaliza o prazo.