A Zumba triunfa entre as propostas deportivas de Carral

Sen dúbida a actividade deportiva de moda actualmente é zumba, e en Carral este feito non podería ser distinto. A concellaría de deportes de Carral ofertou esta actividade a principios de setembro como novidade dentro do curso 2013/2014 do programa das escolas deportivas municipais. Dende entón o número de inscritas/vos non deixou de crecer, alcanzando xa as 80 participantes ademais de numerosos interesados en lista de espera.

As clases teñen lugar no pavillón de Espiño os luns e os mércores, entre as 21.00 e as 22.00 un primeiro grupo e máis numeroso, e entre as 22.00 e as 23.00 h un segundo grupo. Aínda que a actividade está aberta a todo o mundo, maior de 14 anos, a maioría das participantes son mulleres, sendo os homes só 5 do total de alumnos.

Atendendo á numerosa demanda que dende o Concello están a detectar, a concellaría de deportes ten decido lanzar un novo grupo de zumba que se levará a cabo os martes e xoves polas mañás, entre as 10.00 e as 11.00 h. na mesma instalación. Con este novo grupo preténdese dar cabida a moitos dos inscritos na lista de espera da actividade así como ampliar esta oferta deportiva a aquelas persoas que desexan realizar algunha actividade para manterse en forma e pasalo ben ao mesmo tempo.

O prezo desta actividade será, como o resto das escolas deportivas, de14 € ao mes, e o prazo de inscrición estará aberto ata o próximo 28 de novembro, para comezar a actividade dende o mes de decembro ata maio, mes no que rematan todas as actividades municipais.

Para todos/ás aquelas que desexen informarse ou inscribirse poden dirixirse á Casa da Cultura, no teléfono 981.67.2580 ou no correo electrónico deportes@concellocarral.com.