A Universidade Popular recibe 3.260 solicitudes de preinscrición

Os cursos da Universidade Popular, programa da Concellería de Educación, terán este ano a súa edición máis participativa. Pechado o prazo de preinscrición o pasado xoves, as 3.260 solicitudes convértense nun novo récord, nun programa que non deixa de medrar ano tras ano. Na edición 2013-2014 ofértanse 112 cursos, englobados en idiomas, informática, corpo, saúde e calidade de vida, actividades culturais, ocio e tempo libre, actividades de tipo profesional e artesanía-obradoiros.

Inicio de varios cursos e novidades

Hoxe luns comezan algúns dos cursos de novembro, nos que hai formalizadas 1.234 matrículas: Inglés Básico, Alemán Básico, Zumba, Aproximacíón á lectura, Cata de viños, Escritura creativa, Intervención en problemática específica de xénero, Artes plásticas e Pintura.

Entre as novidades desta edición, destacan cursos como “Aerodance” -combinación de técnicas e movementos de baile e aerobic-, “Aproximación á literatura hispanoamericana do século XX”, “Protocolo empresarial”, “Intelixencia comercial”, “Creación de empresas. Plan de negocio para emprendedores” ou “Monitor de comedor escolar”.

A evolución da participación nos últimos cinco anos foi en constante crecemento, ata chegar a cuadriplicarse. Así, no pasado curso 2012-2013 participaron 2.461 ourensáns, en contraste cos 640 alumnos do curso 2008-2009.