A sociedade SOGARPO conta con 2.263 socios na provincia de Ourense

A Sociedade de Garantía Recíproca de Pontevedra e Ourense, SOGARPO, celebrou esta mañá, na sede da Confederación Empresarial de Ourense, unha reunión do seu Consello de Administración, na que se analizou a actividade levada a cabo pola entidade no transcurso de 2013 para facilitar ás pemes galegas o acceso ao financiamento. SOGARPO conta cun total de 2.263 socios ourensáns, o que supón o 32% do total de asociados á S.G.R.

Na actualidade, SOGARPO mantén diferentes liñas de financiamento co seu aval a través de diferentes entidades bancarias, mediante as cales se están formalizando operacións de préstamo ou créditos destinados a investimento, circulante ou refinanciamento de pasivos cun prazo de amortización máximo de 15 anos. Tamén permanece en vigor a Liña ICO-SGR, que ofrece préstamos para investimento e circulante; así como o convenio Microcréditos 2013 IGAPE-SOGARPO, formalizado co Instituto Galego de Promoción Económica da Xunta de Galicia, que contempla a concesión de préstamos para investimento, non superiores aos 25.000 euros, cun prazo de amortización de até de 5 anos.

José Manuel Pérez Canle, Presidente da CEO, foi designado Conselleiro de SOGARPO o pasado 1 de outubro, e manifestara o seu interese en que este Consello de Administración celebrásese en Ourense, co fin de achegar a realidade da provincia ao conxunto da SGR. José Manuel Pérez Canle é, ademais, Director Xerente da firma ACEITES ABRIL.

Sobre SOGARPO

SOGARPO é unha Sociedade de Garantía Recíproca galega que opera fundamentalmente nas provincias de Ourense e Pontevedra. A súa misión é a concesión de avais, para facilitar o acceso ao crédito das pemes e autónomos galegos en condicións vantaxosas en canto a tipos de interese e prazos de amortización, ofrecendo tamén asesoramento financeiro.

As empresas participan como socias cunha cantidade simbólica no seu capital e benefícianse das liñas de financiamento privilexiadas que SOGARPO subscribe con diversos organismos públicos, como o IGAPE, distintas entidades de crédito, etc. SOGARPO supera os 7.000 socios partícipes e conta con preto de 30 socios protectores (Administración, Entidades de Crédito, Cámaras de Comercio, Confederacións de Empresarios, etc.).