A Laracha convoca o tradicional concurso de postais e contos de Nadal

O Concello da Laracha está ultimando o contido do programa de eventos e actividades de Nadal, que contará con propostas para todos os públicos desde finais de ano e ata a Cabalgata dos Reis Magos do 5 de xaneiro, coincidindo coas vacacións nos centros de ensino.

No marco deste programa desenvolveranse os tradicionais concursos de postais e conto que serán convocados nos próximos días e nos que se convidará a participar a todos os alumnos dos colexios da CEIP Otero Pedrayo da Laracha, CEIP Alfredo Brañas de Paiosaco, CEIP de Caión, CEIP A Revoltiña de Soandres e EEI de Cumiáns en Montemaior.

O certame de conto irá dirixido, como en anteriores edicións, a estudantes do terceiro ciclo (quinto e sexto) de primaria. No de postais poderán participar alumnos de infantil e dos dous primeiros ciclos de primaria, estando establecidas categorías de premios diferenciadas por grupos de idade. No concurso de postais, ademais dos traballos individuais, tamén se permite a participación conxunta de toda unha aula.

A mediados de decembro o xurado designado polo Concello da Laracha –composto habitualmente por representantes da concellería de cultura e ensino, a biblioteca municipal, o Centro de Información ás Mulleres (CIM) e os colexios- valorará todos os traballos presentados e outorgará os premios e, de ser o caso, os accésits.

Os nenos que resulten gañadores recibirán os seus agasallos, compostos por xogos e material educativo, no seu propio centro educativo antes das vacacións de Nadal.