A gala do piragüismo galego homenaxea a 43 padexeiros da comunidade

Corenta e tres padexeiros galegos recibirán hoxe unha homenaxe na Gala do Piragüismo Galego que se celebrará a partir das 18.30 horas no Auditorium de Campolongo (Pontevedra). Todos eles, tanto de categoría masculina como feminina, participaron en diversas competicións internacionais. Galicia foi a autonomía que máis deportistas achegou ao equipo español durante o presente ano.

A gala servirá tamén para recoñecer a Iván Alonso como mellor deportista masculino e a Teresa Portela na categoría feminina. O tudense, con catro medallas a nivel internacional, volveu confirmar que é un especialista no maratón. Gañou o Campionato de Europa en K-1 e K-2 e foi campión do Mundo en K-1 e subcampión en K-2.

Teresa Portela conquistou a medalla de prata no Campionato de Europa en K-1 200 metros. O padexeiro de Cangas estivo moi preto da medalla de ouro, que lle escapou por escasas milésimas. Teresa Portela, cunha longa traxectoria deportiva, confirmou en Montemor O Velho que un dos seus grandes desafíos é o poder competir nos Xogos Olímpicos de Brasil.

A Gala de Piragüismo Galego tamén servirá para entregar os trofeos aos distintos clubs que ocuparon os primeiros lugares nas distintas ligas que organiza a Federación Galega de Piragüismo. A Escola de Piragüismo Cidade de Pontevedra, o Kaiak Tudense, As Torres Romería Vikinga, Breogán do Grove, Club de Mar Ría de Aldán Hermanos, Gandón, Copacabana de Ferrol, Piragüismo Cambados, Club Deportivo Muiño Teixugos, Fluvial O Barco, Fluvial de Lugo, Allariz e Firrete son os gañadores en diversas especialidades.

No transcurso da gala tamén se sorteará diverso material deportivo entre os asistentes. O acto celebrarase despois da asemblea anual da Federación Galega de Piragüismo. Nesta presentarase o balance económico da tempada, o presuposto para a próximo ano e tamén un avance da actividade deportiva para 2014.