24 veciños de Frades participaron nun curso de condución de carretas elevadoras

Un total de 24 veciños de Frades participaron nun curso de condución e manexo de carretas elevadoras organizado polo Concello de Frades. Durante as vinte horas lectivas do curso, os alumnos aprenderon os coñecementos precisos que os capacitan para conducir carretas elevadores con precisión e seguridade, como amosaron nas instalacións da Cooperativa Central de Frades durante a parte práctica do curso.

E é que despois dunha primeira introdución teórica de 4 horas no multiusos de Frades, os alumnos desprazáronse ata a Cooperativa Central de Frades para levar a cabo as prácticas, realizando tarefas de paletización e despaletización, así como aprendendo como levar a cabo operacións de mantemento e reparación básicas nestas máquinas.

O próximo curso ofertado polo Concello de Frades é o de manipulador de alimentos, que terá lugar no multiusoso o 13 de decembro e permitirá aos participantes conseguir ou renovar este carné, imprescindible á hora de optar a un emprego en empresas relacionadas coa manipulación de alimentos no sector hostaleiro (camareiros, panadeiros, dependentes de ultramarinos), alimentario, comedores escolares… Os veciños e veciñas interesados en participar poden anotarse na Casa do Concello ou chamando ao 981 695 567. O prezo de matrícula é de 22 euros.