Uns 500 mozos titulados traballarán durante un ano en 379 empresas de Pontevedra

500 mozos titulados universitarios, sen experiencia laboral previa, traballarán durante un ano en 379 empresas da provincia de Pontevedra grazas ó Plan de prácticas laborais en empresas do sector privado, que, cunha dotación de 4 millóns de euros, pon en marcha a Deputación de Pontevedra, segundo informou hoxe en rolda de prensa o seu presidente, Rafael Louzán.

Louzán sinalou que a institución provincial é a única Administración que leva a cabo un proceso destas características, financiando prácticas laborais de mozos titulados en empresas do sector privado. Lembrou que, en total, este ano a Deputación investiu 20 millóns de euros para contratar 4.000 desempregados a través de diversos plans de emprego para mozos titulados, operarios de servizos, etc.

Na súa comparecencia, tras a Xunta de Goberno na que se aprobou a dita selección de empresas, Louzán asegurou que unha comisión de seguimento vixiará e validará o traballo nas empresas privadas, e afirmou que estas garanten, nunha porcentaxe moi alta, a continuidade laboral dos mozos unha vez concluído o período establecido no Plan. Para iso a Deputación asinará un convenio con cada unha das 379 empresas seleccionadas.

O presidente asegurou que este programa ten como obxectivo ofrecerlles ós mozos titulados unha primeira oportunidade de traballar na súa especialidade e de continuar co seu contrato laboral; busca tamén contribuír a reactivar a economía da provincia e das súas empresas.

As empresas que solicitaron participar no Plan foron 479; destas quedaron excluídas 46 e foron admitidas 433, resultando finalmente adxudicatarias 379.

As empresas demandaron mozos de 103 titulacións diferentes e un número de bolseiros que acadou a cifra de 992. O número de bolsas que se convoca é de 424, e, finalmente, chegará a 500.

Para a selección das empresas unha comisión, formada por técnicos provinciais, da Universidade de Vigo e da CEP, aplicou criterios coma o proxecto de práctica laboral (5 puntos), o compromiso de inserción laboral posterior ó remate do Plan (4 puntos) e outras  melloras (1 punto).

Con estes criterios seleccionáronse 379 empresas de toda a provincia: 337 recibirán un bolseiro, 39 dous, e 3 contarán co traballo de tres bolseiros. No tocante ás 424 bolsas que se van convocar, 283 serán para titulados universitarios, 126 para ciclos superiores e 15 para ciclos medios. En total serán mozos de 103 titulacións diferentes.

Vigo (123 bolseiros), Pontevedra (70), Lalín (27), O Porriño (22), Vilagarcía de Arousa (17), Poio (14), Cambados (13) e Silleda (11) son os principais concellos que recibirán bolseiros nas súas empresas.

O maior número de bolsas por titulación corresponde á licenciatura en Administración de Empresas, con 68; dáse a circunstancia de que na provincia de Pontevedra hai 705 desempregados con esta licenciatura. Séguenlle o Ciclo Superior en Administración e Finanzas (38), o Ciclo Superior en Xestión comercial e Marketing (11), Relacións Laborais (11), licenciatura en Psicoloxía (10) e Xornalismo (10).

Os bolseiros percibirán entre 600 e 800 € ó mes, unha cantidade que asumirá a Deputación, así como todos os demais custos.

O BOPPO (Boletín Oficial da Provincia de Pontevedra) –que se pode descargar en www.boppo.depo.es– publica hoxe, 30 de outubro, a convocatoria de 424 bolsas de prácticas laborais en empresas privadas. O prazo de presentación de solicitudes será de 10 días hábiles, desde o 31 de outubro ata o 12 de novembro.

Os bolseiros serán seleccionados en dúas fases: na primeira valoraranse de 0 a 7 puntos o currículo e o expediente; e na segunda realizarase unha entrevista relacionada coa titulación, cunha valoración de 0 a 3 puntos. O proceso rematará o 31 de decembro, a data na que os mozos titulados comezarán a traballar.