Sevilla inaugura o V Encontro de Casas Rexionais e Provinciais

Acto de entrega da Anduriña de Ouro do Lar Gallego de Sevilla ao alcalde da cidade, Juan Ignacio Zoido

O presidente da Xunta, Alberto Núñez Feijóo, defendeu os principios de igualdade e de solidariedade como “as ferramentas máis útiles para articular a pluralidade de rexións e nacionalidades” do conxunto español. Así o sinalou durante a inauguración do V Encontro de Casas Rexionais e Provinciais que se celebra en Sevilla e que nesta edición ten Galicia como Autonomía homenaxeada.

Na súa intervención, o mandatario autonómico referiuse a que quizais o paso do tempo faga necesario “abrir espazos de diálogo” para debater propostas que permitan afrontar “con maior fortaleza” os desafíos presentes e futuros desta “casa común” que é España. Propostas todas elas, dixo, “que deben elevarse sobre os sólidos cimentos da igualdade e a solidariedade que nos definen como nación”.

Feijóo lembrou que a experiencia de 35 anos de democracia converte en “irrenunciable” a concepción de España como un espazo “de xustiza e equilibrio”. “Sabemos que fundir esforzos, ideas e esperanzas é sempre máis proveitoso que o illamento para encarar calquera vicisitude”, afirmou.

Importancia das casas rexionais e provinciais

“De todo isto –argumentou-, poderían falar longamente os membros das casas rexionais e provinciais representadas nesta mostra porque elas fixeron da solidariedade o principal motor da súa existencia”.

O presidente da Xunta incidiu na importancia do papel que desempeñan as casas rexionais e provinciais, ao terse revelado como a “fórmula perfecta” para enlazar o apego á orixe coa vinculación aos axentes políticos, económicos e sociais do lugar do destino. “Conxugaron á perfección a solidariedade co paisano e a exaltación da cultura propia coa inmersión plena no novo escenario vital” e, deste modo, evidenciaron que “non existe contradición algunha entre conservar a identidade propia e abrir esta ao contorno”.

“En calquera das rexións nas que se asentaron, os emigrantes españois alcanzaron ese equilibrio sen conflitos”; lográrono “coa forza da súa vontade”, pero tamén, “coa xenerosidade de todos os territorios que os acolleron como a iguais, que lles brindaron canles de integración tolerantes e respectuosas, invitándoos a sumarse e a contribuír ao funcionamento da súa comunidade”, concluíu.

Imposición Anduriña de Ouro

O presidente da Xunta participou, tamén, no acto institucional de entrega da Anduriña de Ouro do Lar Gallego de Sevilla ao alcalde da cidade, Juan Ignacio Zoido, onde resaltou o carácter cosmopolita dos galegos, aspecto que os ten levado a desafiar lindes e a “acumular culturas e patrias”, creando unha perfecta amalgama coas xentes e lugares de acollida.

Feijóo agradeceulle ao Lar Gallego de Sevilla a hospitalidade e a calorosa acollida que lle brindou na súa casa.

A Juan Ignacio Zoido –a quen felicitou pola distinción coa que foi condecorado hoxe- cualificouno como servidor público exemplar e púxoo como exemplo de persoa feita a si mesma, dun home educado nos valores do sacrificio e do esforzo.