Retírase o valado do espazo arqueolóxico da Ponte do Burgo pero suspéndese a inauguración

As malas condicións meteorolóxicas previstas para os vindeiros días, levou esta mañá á Concellaría de Patrimonio Histórico que xestiona Luís Bará a suspender os actos oficiais previstos para mañá pola tarde con motivo da inauguración do novo espazo arqueolóxico da ponte do Burgo, na praza de Valentín García Escudero, así como as actividades infantís programadas.

De todos os xeitos, o alcalde e o concelleiro visitarán pola mañá, a partir das 12.30 horas, a zona, momento no que está previsto que se retire todo o valado que acota o espazo arqueolóxico, que estará debidamente complementado con varios paneis informativos e xa se disporá de información de man sobre o xacemento.

O que quedará pendente de apertura será o parque infantil xa que toda a área está enchoupada e pendente dos últimos remates até que non deixe de chover. A pesar de aprazar esta inauguración, a Concellaría de Patrimonio Histórico está a espera de programar este acto para celebrar xunto cos veciños a incorporación ao patrimonio histórico da cidade este novo espazo arqueolóxico, así como as súas instalacións de recreo que o complementan.