Parabéns na Coruña para o artista Miguelanxo Prado polo Premio Nacional do Cómic

O Concello da Coruña transmite o seu máis sincero parabén ao artista coruñés Miguelanxo Prado que acaba de ser galardoado co Premio Nacional do Cómic pola súa obra Ardalén, na que o lector pode encontrar referencias ao antigo peirao do porto do que partían os emigrantes cara a América, á Costa da Unión (hoxe cale Pla e Cancela), á Fonte de San Andrés e á Torre de Hércules.

O Goberno local quere destacar a figura de Miguelanxo Prado como creador e director do salón do cómic Viñetas dende ou Atlántico, que tras o seu nacemento en agosto de 1998, e despois de dezaseis edicións, se converteu nunha das bandeiras das Festas de María Pita organizadas polo Concello da Coruña e nun dos festivais de referencia dentro do mundo da banda deseñada española.

Gañador dos galardóns principais de salóns tan prestixiosos como os de Angoulême e Barcelona, recoñecido tamén co estadounidense premio Eisner (na categoría de mellor antoloxía e compartido con outros autores) e co alemán Max-und-Moritz, Prado recibe agora o Premio Nacional do Cómic 2013 por unha obra sobre a memoria, a emigración e o amor como Ardalén.

Este recoñecemento súmase aos recibidos, recentemente, polos coruñeses Manuel Álvarez Torneiro e José María Merino, Premio Nacional de Poesía 2013 e Premio Nacional de Narrativa 2013, respectivamente, o que certifica o bo momento dos creadores oriúndos da cidade