Os servizos municipais da Laracha reparan as incidencias provocadas polo temporal

Danos no paseo fluvial

O temporal de choiva e vento que azoutou a toda Galicia na xornada de onte provocou danos de certa entidade en diferentes puntos do termo municipal da Laracha, especialmente na rede viaria e tamén no paseo fluvial do río Vilán, na parroquia de Cabovilaño.

Os servizos municipais están a reparar as incidencias detectadas. Dúas brigadas traballan intensamente desde primeira hora desta mañá nas zonas afectadas para restablecer a normalidade o antes posible e facilitar a circulación dos vehículos por todas as estradas do Concello.

As incidencias nas carreteiras consistiron, esencialmente, no desbordamento de cañerías, sumidoiros e desaugadoiros, así como a presenza de barro na superficie da calzada e de certos desprendementos de terra detectados nas parroquias de Soandres e Montemaior e tamén nos aparcadoiros da praia de Caión.

No caso do paseo fluvial de Cabovilaño a caída dunha árbore de importante tamaño supuxo a ruptura dun tramo da barandilla de madeira. O tronco será cortado e retirado nas próximas horas. A zona afectada foi inmediatamente acordoada para advertir da situación aos peóns que poidan desprazarse polas inmediacións deste lugar.