O Santiago Futsal pode poñerse líder nesta quinta xornada

O Santiago Futsal recibe este venres 11, a Ríos Renovables Ribeira de Navarra no Multiúsos Fontes do Sar ás 21h. As entradas xa están á venda nas oficinas do club (de 10 h a 14 h e de 17 h a 20 h) e en despacho o mesmo día do partido dende as 20h. Os prezos son os habituais a 10 € para adultos e 1 € infantís, tendo os subscritores a posibilidade de retirar ata 2 entradas por 5 € cada unha (só en venda anticipada nas oficinas do club ata o venres ás 14 h).

O Santiago Futsal, que tras 4 xornadas está en quinta posición con 8 puntos tras sumar dúas vitorias e dous empates, enfrontarase ao Ríos Renovables Ribeira de Navarra, que suma 6 puntos tras disputar tres partidos (a primeira xornada descansou), onde obtivo dúas vitorias ante Colexios Areas Gran Canaria (4-1) e Xaén Paraíso Interior (1-2), e unha derrota ante inter Movistar (2-4).

Os de Tudela volven ao Multiúsos na súa terceira tempada en Primeira División, onde sempre puntuaron: a primeira tempada cun empate a dous e o ano pasado vencendo 3-5. Tamén está na retina o último enfrontamento entre ambos os dous nos cuartos de final da Copa de España, onde os santiagueses lograron o pase ás semifinais tras darlle a volta ao marcador no último minuto, vencendo 4-5. Por iso, os de Santi Valladares esperan seguir coa súa condición de invictos e conseguir a súa terceira vitoria consecutiva na casa no que vai de liga.

Para o partido de mañá, Santi Valladares seguirá sen non poder contar con Mario Costa nin Hamza, polo que a convocatoria a forman: David, Barroso, Palomeque, Lucho, Eloy Rojas, Juanjo (páx.), Hugo, Raúl (páx.), Chus, Santi, David Pazos e Diego Quintela. Os árbitros do encontro serán Cid Bragado e Pérez Álvarez, do colexio galego e castelán-leonés.

O técnico Santi Valladares analizou o partido da pasada fin de semana

Compareceu en rolda de prensa Santi Valladares, técnico do Santiago Futsal, que analizando o último partido dos santiagueses no Palau, onde empataron a dous co FC Barcelona Alusport, o técnico santiagués afirmou que “o equipo rematou o partido coa sensación de ter feito as cousas ben, independentemente de que ao final se nos escapasen, entre comiñas, eses dous puntos. Demos un pasito máis, pode que puxésemos o listón un pouco máis alto, pero esa é o único xeito que coñecemos para mellorar. A pesar diso, o equipo é consciente de que aínda non gañamos nada e que hai que seguir traballando partido a partido”.

Con respecto aos próximos partidos do Santiago Futsal, Santi Valladares considera que “todos os equipos nos estamos a xogar a Copa e algúns puntos para a salvación. Espérannos catro partidos que deberiamos gañar, pero imos ter que ir con coidado, saíndo como temos que saír en todos os partidos,”.

Falando do rival deste venres, o técnico santiagués resalta que “será un partido moi competido e que creo que se vai decidir ao final, porque é un equipo intenso, con moi boa posesión do balón. Manexan moi ben o balón, con control e pase, é moi difícil quitarlles o balón. Ademais é un equipo aguerrido, con xente que coñecemos moi ben dende aquí,”.