O Santiago Futsal busca a súa primeira vitoria a domicilio

O Santiago Futsal disputa mañá a oitava xornada de liga ante Colexios Areas Gran Canaria a partir das 22 h (hora peninsular). Os de Santi Valladares viaxan esta noite rumbo a Las Palmas para tratar de sumar 3 puntos tras descansar a última xornada e retomar o bo refacho de resultados ata o seu primeiro tropezón en liga ante Montesinos Jumilla.

Trataríase ademais dos tres primeiros puntos fóra de casa ante o último da táboa, que tras 6 xornadas (xa descansou unha), aínda non sumou ningún punto, pero seguro poñerá as cousas difíciles aos santiagueses na loita por lograr conseguir os tres puntos ante a súa afección. Pola súa banda, o Santiago Futsal é quinto con 11 puntos e co obxectivo claro de lograr afianzarse entre os 8 primeiros para asegurarse un posto na Copa de España.

Santiago Futsal e Colexios Areas Gran Canaria xa viron as caras en pretempada no torneo de presentación do club santiagués ante a súa afección, onde os de Santi Valladares venceron 3-2 tras unha boa primeira parte, pero na que os canarios rozaron o empate nos últimos minutos da segunda.

Os 12 xogadores que viaxan a Las Palmas e forman a convocatoria do Santiago Futsal son: David (C), Barroso, Palomeque, Lucho, Eloy Rojas, Juanjo (páx.), Hugo, Raúl (páx.), Chus, Santi, David Pazos e Diego Quintela. Os árbitros do encontro son Do Pozo García e López Jiménez do colexio madrileño.

Sala de prensa

Santi Valladares, adestrador do Santiago Futsal, compareceu esta mañá en rolda de prensa afirmando que “é un partido ao que lle teño moito respecto e que vaian aí abaixo a estas alturas non me di nada, é un partido moi perigoso. Eles teñen moitas urxencias e non teñen un equipo para ir con 0 puntos. Saben que sumando estes tres puntos están aí ao bordo da salvación”.

O técnico do Santiago Futsal, engadiu tamén que “o equipo sabe que para nós son tres puntos moi importantes e non necesitan motivación extra. É un rival que nos vai esixir máximo nivel de concentración, polo que hai que saber ler moi ben en cada caso o que hai que facer. Só hai que recordar que no partido que xogamos aquí en pretempada iamos gañando 3-0 e ao final quedamos 3-2, polo que temos que saír moi enchufados e moi concentrados e non deixar que eles se metan no partido”.