O departamento de promoción económica reforma a rúa Constitución

A concellaría de Promoción Económica comezará a reforma da rúa comercial Constitución no Tempero a próxima semana. Trátase dunha obra necesaria que se poderá levar a cabo grazas á subvención dos Fondos FEDER e a Consellería de Economía e Industria. En concreto, a actuación refírese ao tramo que existe entre a praza Manuel Murguía e a Costa dá Valo. A obra xa está adxudicada e o obxectivo é que finalice a principios do mes de decembro. Trátase dunha obra que dará unha nova imaxe a unha das rúas cambresas que alberga máis tecido comercial.

A actuación que supón un custo de preto de 80.000 euros (sufragados na súa maior parte polos FEDER e a Xunta) consistirá en construír unhas novas beirarrúas e bordos, repoñer a baixante de pluviais, pavimentar a rúa, crear unha nova zona de carga e descarga e na colocación de mobiliario público como novas papeleiras e unha nova varanda que dea maior seguridade ao tramo sobreelevado peonil existente na devandita rúa. “Creo que é unha actuación prioritaria para O Tempero, xa que é un tramo que non puido ser renovado nas obras que se levaron a cabo coa humanización do Graxal del Plan FEDER culminado en 2012, e que agora grazas a esta axuda quedará arranxada,” apuntou o alcalde, Manuel Rivas.

Segundo o primeiro edil, a rúa Constitución é unha rúa de vital importancia para o tecido comercial e o goberno local aposta por renovar a súa imaxe porque estamos seguros que axudará a revitalizar a zona.

A Policía Local levará a cabo unha reordenación do tráfico mentres duren as obras co obxectivo de evitar maiores problemas aos veciños. “As obras sempre son molestas pero son necesarias para mellorar a nosa calidade de vida. Quero que os veciños saiban que imos facer todo o posible para que sufran o menor posible esta actuación que estou seguro que ven como necesaria”, apuntou Rivas.