O departamento de Benestar Social de Ortigueira activa os talleres de memoria nun total de 12 centros sociais do rural

A Concellaría de Benestar continúa esta mesma tarde o programa municipal de envellecemento activo. E faina, retomando os xa tradicionais talleres de memoria dos que se beneficiarán ata o mes de xuño os usuarios/ás dunha ducia de centros sociais do rural.

Impartida polo equipo de psicólogas do departamento de Benestar Social, a iniciativa busca contribuír a previr o envellecemento cerebral da poboación maior, axudando a que conserven a súa autonomía persoal, a través de exercicios e actividades de memorización.

Os talleres grupales non se cinguen á mera aprendizaxe de técnicas para manter a memoria por parte do alumnado. Neles, trátase de brindar aos participantes -ata agora, a maioría mulleres- a posibilidade de que compartan experiencias, comprendan os esquecementos nun contexto de intercambio e exercitación e, ao mesmo tempo, amplíen as súas relacións veciñais.

A oferta incluirá os centro de ponte Mera e Mera de Riba (luns 16:30 e 18:15 horas respectivamente), A Basteira e Baleo (martes ás 16:30 h), Espasante Puerto e Couzadoiro (martes ás 18:15 h); Ortigueira e San Adrián (mércores 16:30 h), Senra (mércores 18:30 h); Céltigos e Loiba (xoves 16:30 h) e Ladrido (xoves ás 18:30 h).

Dende a Concellaría de Benestar Social faise unha chamada para que todos os maiores que queiran incorporarse aos talleres de memoria, incluídos no programa “Activa vos teus anos” avalado por Deputación da Coruña, póñanse en contacto co centro social de Ortigueira, no teléfono 981402542.

O Concello de Ortigueira reafirma deste modo o seu compromiso co rural, afondando no proceso de descentralización do programa de actividades formativas e de ocio organizadas dende o concello, aproveitando a ampla rede de centros sociais municipais.