O Consorcio As Mariñas forma en competencias crave a 20 veciños da comarca

O Consorcio As Mariñas iniciou esta semana unha formación en competencias crave para veciños da comarca beneficiarios da Renda de Integración Social de Galicia. O obxectivo da acción consiste en mellorar a empregabilidade de persoas en risco de exclusión social dentro dun itinerario personalizado de inserción sociolaboral.

O curso de preparación de Competencias Clave, Nivel 2, comezou o pasado luns 30 de setembro e prolongarase ata o 25 de novembro. Ten lugar no municipio de Culleredo, na sala de actividades sita na Costa da Lonxa (núcleo do Burgo). As materias que se están a impartir son Lingua Galega, Lingua Castelá e Matemáticas. As sesións desenvólvense os luns, martes e xoves, a razón de tres horas de formación en cada xornada para completar un total de 75. O número de participantes no curso é de 20, todos veciños dos concellos de Culleredo, Cambre e Oleiros.