O CIM da Laracha visitará o Pazo de Mariñán

O Centro de Información ás Mulleres (CIM) da Laracha, en colaboración co CIM do Concello de Arteixo e a Deputación Provincial da Coruña, organiza unha visita ao Pazo de Mariñán que terá lugar o sábado día 9 de novembro.

As mulleres que desexen participar nesta excursión deben formalizar a súa inscrición, que é gratuíta, acudindo ás oficinas do CIM (no edificio administrativo da Laracha, situado no número 60 da céntrica avenida Fisterra) ou chamar o teléfono 981 612 811. O prazo remata o xoves 7 de novembro. As asistentes poderán ir acompañadas polas súas fillas e fillos.

O programa da xornada iniciarase ás 9.00 horas coa saída do autobús da explanada do IES Agra de Leborís. A chegada está prevista en torno ás 14.00 horas.

O Pazo de Mariñán, no municipio de Bergondo, é un histórico edificio mandado construír no século XV polo nobre Gómez Pérez das Mariñas. Tanto o pazo como os seus xardíns foron declarados conxunto histórico-artístico no ano 1972.

Actualmente o Pazo de Mariñán, que é de titularidade da Deputación Provincial da Coruña, acolle actos institucionais e fai as funcións de museo –reúne gran parte da colección artística da propia Deputación- e centro de cursos e eventos.