O Azkar desinflouse despois de que o Manacor remontase (2-4)

Encontro do Azkar – Manacor

Hoxe o Azkar Lugo FS non puido dar continuidade cunha nova vitoria ao seu bo xogo e á súa primeira vitoria do pasado martes. Hoxe os galegos pareceron diluírse despois de que o Hospital LLevant Manacor lle dese a volta ao marcador no segundo periodo e os lucenses con pequenos erros permitiron ao rival levarse a primeira vitoria da campaña. Hoxe o Azkar non foi por momentos ese equipo competitivo, quizais polo cansazo, e acabouno pagando ante un conxunto o balear efectivo e moi serio.

O primeiro periodo foi moi igualado, pareceu saír un pouco máis enchufado pero pronto as forzas igualáronse. Aínda así as ocasións non eran moitas e tanto Mendiola como Barrón atallaban os disparos exteriores de ambos equipos. O Azkar, con máis posesión, comezou a crer en poder abrir o marcador e conseguiuno ao minuto 8 cunha boa combinación entre Cuco e Chano, o madrileño picábaa ao área e o gaditano de cabeza non perdoaba (1-0). Pese ao tanto lucense, o partido estaba aberto, e o Manacor tamén xeraba perigo, como a ocasión superado o ecuador do primeiro acto que Mendiola detiña en liña de gol a remate de Vadillo. O Azkar buscaba o segundo gol, pero custáballe por momentos atacar a férrea defensa visitante. Antes do descanso o Manacor xerou o maior perigo e iso levou ao empate dos de Tomás de Dios a disparo de Joao que se coaba entre a defensa lucense e Mendiola (1-1 minuto 18). O empate parecía o máis xusto ao descanso.

Tralo paso por vestiarios o choque arrincou coa mesma intensidade que os primeiros vinte minutos. Dúas paradas de Mendiola avisaban do perigo visitante e o Azkar aínda que por momentos parecía ter máis posesión que o seu rival, non había a frescura de anteriores partidos, o equipo parecía ansioso, e o peor aos 27 minutos unha xogada de Taffy facía que o brasileiro se desfixese de Antonio Diz e batese por abaixo a Mendiola poñendo por diante aos seus co 1-2. Reaccionou o Azkar Lugo tralo tanto e Álex Diz nunha contra en superioridade, mandábaa cruzada e fóra por pouco. Dous minutos máis tarde Chicho finalizaría para os mallorquíns unha contra que significaba o 1-3. Iso deixou bastante tocado aos lucenses, que pese a iso un minuto despois reducía a diferenza ao 2-3 cun golazo de trinta metros de Aranburu ao ver adiantado a Barrón. O Azkar estaba un gol por baixo pero dentro do partido, aínda así faltaba algo, algo doutros partidos que non lle permitían lograr a igualada, mentres que o Manacor amosábase moi serio en defensa e quería saír á contra para xerar perigo. Ao final a falta de agresividade en defensa dos galegos permitiría aos visitantes dar un paso de xigante para levarse a vitoria e é que Vadillo tras conectar co pívot, recibía de novo para bater por abaixo a Mendiola (2-4). Nos últimos cinco minutos o Azkar foise a por todas con porteiro-xogador, xerou todo o perigo da recta final, e aínda que moveu rápido o balón para descolocar á defensa manacorí, todos os seus disparos íanse arriba e ata cando había segundas opcións resbalóns e falta de forzas impedían o gol galego. Ao final derrota que fai que Azkar e Manacor empaten a cinco puntos na clasificación.

Ficha técnica:

Azkar Lugo 2: Mendiola, Aranburu, Cuco, Álex Diz e Chano, -cinco inicial-, Iago Rodríguez, Diego Núñez, Antonio Diz e Jandri.
H. Llevant Manacor 4: Barrón, Vadillo, Joselito, Lemine e Chicho, -cinco inicial-, Joao Batista, Taffy, Manu e Vega.
Árbitros: Sanzol Goñi e Urdanoz Apezteguia (comité navarro). Amonestaron con tarxeta amarela a Cuco e Aranburu (Azkar) e a Joao e Barrón (Manacor).
Incidencias: 7ª xornada de liga en 1ª división. Palacio Municipal dos Deportes de Lugo. Uns 1500 espectadores. Antes do partido a LNFS, o Azkar Lugo FS e o Hospital Llevant Manacor amosaron o seu apoio á Asociación Española contra o Cancro (AECC) con motivo do Día Internacional contra o Cancro de mama que se celebra mañá sábado 19 de outubro.
Goles: 1-0 min. 8 Chano, 1-1 min. 18 Joao, 1-2 min. 26 Taffy, 2-3 min. 30 Aranburu e 2-4 min. 35 Vadillo.