Iker Martínez convértese no protagonista no Clinic Movistar de praia América

O club Beachescolas de Playa América, situado en Nigrán (Pontevedra), acolleu hoxe a quinta das Clases Maxistrais que organiza Movistar xunto coa Federación Galega de Vela co obxectivo de traer a Galicia aos mellores regatistas do mundo, e nesta ocasión foi o dobre medallista olímpico Iker Martínez quen se puxo á fronte de posiblemente a Máster Class máis esperada.

Sen lugar a dúbidas, a meteoroloxía permitiu que os 18 participantes nesta última Másters Class de luxo gozasen dunha xornada perfecta para a navegación, e aínda que as previsións xa anticipaban que o vento sería bastante suave, si foi suficiente para que a frota de 10 catamaráns aproveitase ao máximo esta Clase Maxistral con Iker Martínez en augas galegas.

Máster Class de luxo en Nigrán

Dende primeira hora da mañá a expectación por recibir o campión olímpico e vueltamundista era máxima. Os case 20 regatistas galegos inscritos non vían o momento de comezar a Máster Class, e é que non todos os días se pode gozar dunha xornada de navegación baixo as ordes dun dos mellores regatistas do mundo.

Durante as dúas horas de charla previa antes de saír á auga ningún quixo perder a ocasión de facerlle un gran número de preguntas acerca de técnica e táctica de regata, manobras e tamén sobre a súa experiencia como regatista de vela oceánica durante a Volvo Ocean Race e a Barcelona World Race.
 
Posteriormente, e tras a poñer a punto o material para a primeira sesión de navegación, os catamaráns botábanse á auga ao fío das 13:00 horas para gozar da primeira das dúas sesións de navegación e con ganas de espremer ao máximo a Máster Class co mellor regatista do mundo segundo a ISAF o pasado 2011.

Así, o bo tempo e as ganas de gozar do deporte fixeron que a xornada fose de dez, e é que está claro que ter en fronte a un bimedallista olímpico -ouro en Atenas 2004 e prata en Beijing 2008- que ademais deu a volta ao mundo a vela ata en tres ocasións é unha grande oportunidade para calquera regatista ou afeccionado a este deporte. Tal e como apuntaban algúns dos participantes: “sen dúbida esta é unha iniciativa fantástica. Ter aquí un campión olímpico como Iker Martínez é unha oportunidade única para nós”.

O clinic con Iker Martínez en Praia América está previsto que finalice esta tarde tras a segunda xornada de navegación ás 19:00 horas. As Máster Class de Movistar continuarán durante o mes de outubro por toda a xeografía galega.

Támara Echegoyen collerá a testemuña das Máster Class de Movistar

Despois de que a finais do pasado mes de agosto Movistar presentase estas Clases Maxistrais que organiza xunto coa Federación Galega de Vela, o clinic celebrado hoxe en Praia América con Iker Martínez era o quinto dos oito que se levarán a cabo en Galicia ata finais do mes de outubro. Agora, a campioa olímpica de Match Race en Londres 2012 Támara Echegoyen collerá a testemuña das Máster Class e estará o próximo sábado día 12 en Portosín (A Coruña).