Fundación Ortegalia programa unha nova edición do ciclo infantil de talleres “Ortearte”

Trala boa acolleita do ciclo de talleres do mes de agosto, Fundación Ortegalia retoma este mes as actividades infantís “Ortearte”, destinados a facilitar aos máis pequenos da casa o achegamento á historia, etnografía e medioambiente de Ortigueira e a súa comarca. En principio, están previstas catro sesións para as que xa está aberto o prazo de inscripción.

En cada un dos talleres, ademais de recibir a correspondente introdución teórica, os participantes, pícaros/as de entre 5 e 12 anos de idade, poderán divertirse realizando actividades plásticas orientadas a familiarizarlos dun modo alternativo con distintos momentos históricos.

Así, na proposta denominada “Os celtas” (martes 15 outubro) revisaranse os símbolos celtas e a relación deste pobo coas árbores. En “Do As ao Euro” (xoves 17 outubro) propoñerase unha introdución ao campo da numismática. “Romanos do século XXI” (martes 22 outubro) revisará o legado que conservamos dos romanos na nosa vida cotiá. E, finalmente, o xoves 24 de outubro, prográmase un taller sobre etnografía e medio ambiente, centrado nos molinos e a importancia das enerxías renovables.

As actividades, de 90 minutos de duración cada unha, desenvolveranse a partir das 18:00 horas no Museo Ortegalia e contarán co respaldo da Consellería de Cultura. Para anotarse é preciso dirixirse á Fundación (teléfono 981402413), onde se ofrecerá información adicional sobre a iniciativa lúdica.

O prazo de inscripción concluirá o venres 11 de outubro e o custo por taller será de 4 euros por menor, con descontos do 50% aplicable ao segundo e seguintes menores inscritos da unidade familiar.