Emprendemento como ferramenta para mellorar a empregabilidade dos galegos máis xóvenes

A delegada territorial da Xunta na provincia, Belén do Campo, defendeu a aposta do Goberno galego polo espírito emprendedor como ferramenta para que as mozas e mozos de Galicia poidan acceder a un posto de traballo nestes momentos de dificultades económicas. “Na Xunta de Galicia estamos convencidos de que a cultura do emprendemento debe formar parte tamén das competencias que se ensinan aos cidadáns do mañá desde as etapas máis temperás da súa educación”, engadiu Do Campo.

A máxima representante do Goberno galego na provincia trasladou esta mensaxe durante o acto de presentación do novo curso do Programa Inicia, desenvolvido polo Concello da Coruña, a través da Concellería de Emprego, que dirixe María Luisa Cid. Na súa intervención, a delegada territorial felicitou ao goberno local pola posta en marcha desta iniciativa de difusión e ensinanza do espírito empresarial entre o alumnado de Formación Profesional e de ensinanzas especiais. “O Programa Inicia segue a senda do Plan de Emprendemento no Sistema Educativo de Galicia ‘Eduemprende’, posto en marcha hai máis de tres anos polas Consellerías de Cultura, Educación e Ordenación Universitaria e de Economía e Industria, e reforza a colaboración entre as administracións para avanzar neste obxectivo común”, manifestou.

Na mesma liña, a delegada salientou o papel fundamental que desenvolve a educación no fomento da cultura emprendedora, apuntando que “se falamos de emprendemento, estamos a falar de talento, de creatividade e de iniciativa”. Do Campo recordou que a futura Lei do Emprendemento de Galicia que impulsará Economía e Industria dálle unha importancia primordial ao ensino.

“A Xunta non escatimará esforzos na posta a disposición dos centros educativos e, o máis importante, do seu alumnado, de todas as ferramentas e actuacións necesarias para fomentar o emprendemento”, comentou a delegada territorial, quen, por último, mostrouse convencida de que “se trata dunha forza imprescindible para que Galicia saia da crise con éxito”.