Cedeira acolle a XXIV edición da súa tradicional Festa de Samaín

Cedeira acollerá este fin de semana a XXIV edición do seu tradicional Festa de Samaín. Organizada pola Asociación Amigos de Samaín, a programación arrancará este venres, 1 de novembro, e prolongarase ata o domingo. A oferta de actividades está pensada para toda a familia, con especial protagonismo para os máis pequenos da casa. Así, nenos e nenas poderán participar este venres, dende as cinco da tarde, nun particular taller con castañas, no que realizarán, entre outras creacións, colares. A continuación, sobre as 17,30 horas, novo taller, neste caso de globoflexia e, a partir das 18 h, a organización invitaralles a presenciar un espectáculo de monicreques a cargo de Chincha Rabincha titulado “A xanela do maxín”. Todo iso, no Paseo da Mariña.

A festa continuará o sábado. Ás catro e media da tarde, e no mesmo escenario, iniciarase un taller de cabazas, que posteriormente se poderán presentar a concurso. Ás 17 horas, os máis pequenos poderán formalizar a súa inscrición na tradicional ginkana. E, media hora máis tarde, comezará o taller de maquillaxe. Paralelamente, os asistentes poderán degustar a merenda de outono, a base de requeixo e mel e bolla de azucre, para acompañar con diferentes bebidas. Ao caer a noite chegará unha das actividades máis especiais: o casco vello quedará ás escuras para acoller un pasacalles que guiarán as luces das cabazas. E para rematar a festa á beira do río se procederá á queima da gran cabaza.

Por último, o domingo ás sete da tarde, o Auditorio Municipal acollerá a actuación de Quico Cadaval, que ofrecerá ao público cedeirés o seu cuentacuentos para adultos “Pantasmas familiares”. O mesmo escenario tamén acollerá o pase, en primicia, do videoclip “Unha festa con castañas”, en o que participou xente de Cedeira e da asociación Buxainas.