Ames inicia o novo curso de obradoiros para a prevención de drogodependencias

Os obradoiros para a prevención de drogodependencias postos en marcha polo Concello de Ames o pasado mes de marzo, continúan agora co inicio do novo curso escolar ampliando o número de actividades e de centros nos que se imparten. Deste xeito, e debido ao éxito de solicitude destas actividades, nos próximos meses impartiranse preto de 30 obradoiros en cinco centros educativos do municipio. A estes obradoiros, súmanse os que xa se impartiron a finais do curso pasado no Colexio Alca e que estaban dirixidos a alumnos de 6º de Primaria e de 2º e 4º da ESO.

No pasado mes de marzo, o Executivo amiense decidiu potenciar a programación de obradoiros para a prevención de drogodependencias destinada á mocidade amiense e centrada na impartición de obradoiros educativos nos centros de ensino do municipio. Este conxunto de actividades inclúe un traballo personalizado cos alumnos/as e adaptado ás distintas etapas educativas. Ademais, a iniciativa, que chega ao alumnado dos centros educativos amienses de Agro do Muíño, A Maía, Ventín, Barouta, Colexio Alca e do IES de Bertamiráns e do Milladoiro, está coordinada por persoal técnico do Concello de Ames.

Os obradoiros teñen como obxectivos previr condutas aditivas sobre o consumo de drogas, informar sobre as consecuencias do uso e abuso, aportar ferramentas útiles na aprendizaxe de habilidades sociais, favorecer a realización de actividades alternativas de lecer ou evitar o posible desenvolvemento de condutas de risco.

Centros e obradoiros

Durante os próximos meses, impartiranse novos obradoiros. O primeiro centro en acollelos foi o CEIP A Maía, onde os rapaces e rapazas de 6º de Primaria participaron no obradoiro ‘Aprendemos a comunicarnos asertivamente’. Esta mesma actividade impartiranse no CEIP de Barouta e no CEIP Agro do Muíño ao longo deste mes, cun total de 3 obradoiros.

No caso do IES de Bertamiráns, impartiranse un total de 16 obradoiros dirixidos a diferentes cursos. Así, os alumnos/as de 2º ESO realizarán a actividade ‘Coñézome e tomo as miñas decisións’ e os de 3º tomarán parte no obradoiro titulado ‘Eu paso de movidas, e ti?’. Por último, os alumnos/as de 4º da ESO participarán na actividade ‘Desterrando mitos’.

Como novidade, inclúese nesta iniciativa ao recen estreado IES do Milladoiro, que será o escenario de 7 obradoiros de prevención de drogodependencias destinados ao alumnado de 2º, 3º e 4º da ESO.

O alcalde de Ames, Santiago Amor, subliña que, deste xeito, “dáse cumprimento ao compromiso do Goberno amiense de realizar obradoiros para a prevención de drogodependencias, unha actividade importante para formar, sensibilizar e informar á poboación máis nova do Concello contra esta lacra”. O rexedor fai fincapé en que “para Ames é importante contar cuns obradoiros deste tipo, debido a que somos un Concello cunha poboación moi nova e, polo tanto, moi exposta”.

Obxectivos

Os obradoiros de prevención están centrados na impartición de sesións informativas e obradoiros nas diferentes etapas educativas. Para iso, empréganse ferramentas dinámicas e impulsase a participación e interacción do profesorado. Deste xeito, o que se persegue é que na transición entre as etapas escolares se traballe a prevención de drogodependencias, sempre dun xeito adaptado ao momento que a mocidade está vivindo. Por iso, cada un dos obradoiros está adaptado a cada etapa, facendo fincapé nos temas máis importantes a abordar en cada momento co fin de evitar condutas de risco.

Este xeito de organizar os obradoiros permite dar continuidade ao traballo cos mozos e mozas durante toda a etapa escolar, traballando con todos os niveis educativos e impulsando a prevención dun xeito global e continuo.

Unha vez rematada a impartición dos obradoiros o que se busca é que os mozos e mozas amienses acaden un coñecemento máis amplo da prevención de drogas e espertar o seu interese en participar en diversas actividades que fomenten a vida saudable. Ademais, tentarase que adopten habilidades sociais favorables para o seu desenvolvemento, así como aportarlle ferramentas de interese na resolución de conflitos. Ao remate, farase unha avaliación final do alumnado para comprobar os coñecementos adquiridos. A avaliación do profesorado será continúa e establecerase unha coordinación do Concello de Ames para facer un seguimento dos obradoiros e do cumprimento de obxectivos.