85 veciños participan no programa municipal de apoio á aprendizaxe do inglés

Por noveno ano consecutivo, as clases de reforzo do inglés consolídanse como a actividade extraescolar con maior demanda de cantas oferta o Concello de Ortigueira. A Concejalía de Participación Social e Educación creou grupos tanto no núcleo urbano como nas parroquias de Espasante, Santiago de Mera e O Ermo.

O programa, destinado a complementar a actividade docente ordinaria, persegue, a través de grupos reducidos, que o alumnado alcance unha maior autonomía no uso desta lingua estranxeira; que lle sexa útil tanto para progresar tanto no uso oral como no escrito deste idioma.

Superadas as semanas de proba que se programan cada tempada, polo momento confirmaron xa a súa participación un total 85 veciños e veciñas do municipio (un 7% máis con respecto á cifra de xuño).

Durante o curso 2013- 2014, na Vila ofertaranse entre semana dúas horas lectivas para cada grupo de idade (pícaros/as de 3 a 4 anos, alumnos de 5 e 6 anos, de 7 e 8 anos, de 9 a 12 e de máis de 12 anos e adultos), ás que hai que sumar unha hora semanal de conversación para principiantes e outra para veciños/as cun nivel medio de coñecemento.

Ademais, a existencia de demanda permitiu manter os grupos que funcionaron durante o curso pasado tanto en Espasante (11 persoas) como en Ponte Mera (5) e O Ermo (5).

Desde o departamento Participación Social sublíñase o dobre obxectivo da iniciativa de familiarizar ao alumnado principiante no uso do inglés, e promover un maior dominio entre os usuarios dun nivel intermedio. Explícase ademais que, ao quedar prazas vacantes nalgúns grupos, aínda é posible beneficiarse da iniciativa.