Unha veciña de Narón gaña o sorteo da Ruta do Pincho “Mellor… con pan de Neda”

Elena Vidal García, unha veciña de Narón, poderá desfrutar dunha noite para dúas persoas nun hotel de catro ou cinco estrelas a elixir entre máis de 180 establecementos de Galicia e do resto da Península, así como dunha cea con bodega e almorzo. Todo isto, cortesía do Concello de Neda e dos locais hosteleiros participantes na segunda edición do Concurso e Ruta de Pinchos “Mellor… con pan de Neda”. Foi o presente co que Administración e negocios acordaron premiar a participación no certame, posto en marcha ao abeiro da programación de actos paralelos á Festa do Pan da real vila. E, entre todos os participantes, se levaba a cabo o sorteo o pasado venres no salón de plenos da casa consistorial.

No acto estiveron presentes a concelleira de Promoción Turística, Montse Rico, e representantes de parte dos locais hosteleiros do Concurso. Previamente, ambas partes mantiveron unha xuntanza de traballo na que intercambiaron impresións sobre a iniciativa, así como propostas para mellorala na próxima edición. Doutra banda, tamén comezaron a abordar propostas e colaboracións futuras de aquí a finais de ano.