Talía Teatro representa “O método Grönholm” en Monforte

O vindeiro mércores día 2 de outubro a compañía Talía Teatro representará a obra“O método Grönholm”, no Edificio Multiusos ás 20:15 horas.

Ficha da obra:

Autor               Jordi Galcerán.

Director          Xulio Lago

Elenco              Toño Casais, Artur Trillo, María Ordóñez e Dani Trillo

Sinopse          

Na Sala de Reunións dunha empresa multinacional comparecen catro aspirantes a ocupar un cargo executivo importante. A razón da súa presenza alí é que todos eles foron convocados a unha última proba na que a Empresa decidirá quen dos catro é o elixido para o posto. A proba nesta ocasión vai ser conxunta realizándose polos catro aspirantes ó tempo.

Ó pouco de dar comezo vai quedando claro para todos os aspirantes que aquela non é unha proba convencional. Todos, tres homes e unha muller, son profesionais con ampla experiencia, con cargos importantes en outras empresas na actualidade, afeitos a superar todo tipo de desafíos para alcanzar os obxectivos… Pero esta experiencia, na que entra en xogo o Método Grönholm, é unha experiencia distinta.

A proposta do autor é portadora dun corrosivo compoñente crítico disfrazado de ideoloxía neoliberal, dunha carga de cinismo nada despreciable e dunha impresionante capacidade para xogar “perigosamente” con cousas serias  co mesmo talante que se estivese xogando á brisca ou ás prendas.

O método Grönholm é un xogo constante entre verdades e mentiras. Tal vez, un xogo un pouco perverso, pois as  emocións e os sentimentos das personaxes son manipulados  e sacudidos sen pudor nin compaixón algunha. Algo que resulta escandalosamente normal na sociedade contemporánea.

O prezo de entrada xeral será de cinco euros e de tres euros para estudantes, desempregados e xubilados.