Proxección do documental “As Encobras” no entorno da Igrexa de Santa María Nai de Ourense

Mañá mércores terá lugar unha nova proxección do ciclo de documentais organizado pola Concellería de Cultura a través do Festival de Cine. A proxección de “As Encobras”, será nas escaleiras da Igrexa de Santa María Nai, no lateral da Praza Maior, e comezará a partir das 22 h.

O documental “As Encobras” (2007) narra a historia que viviron os veciños desa localidade no Concello de Cerceda desde o momento en que se propón a extracción de carbón (1974) enterrado debaixo dun gran e fértil val. Pretendíase, co apoio do réxime franquista, a expropiación de terras para que a Unión Europea explotase a mina. Tralo conflito chegou un acordo que só foi parcialmente respectado. Case 40 anos despois, cerca de mil persoas tiveron que abandonar o val.

A produtora Aleuto Medios Dixitais, desenvolve este ciclo que o vindeiro mércores 2 de outubro terá a última proxección co documental “Marea”, centrado na vida dos mariñeiros.