Ponte Caldelas solicita ao executivo autonómico a titularidad da travesía de Tourón, na PO-532

O Pleno da Corporación Municipal de Ponte Caldelas que se celebrará mañá xoves aprobará trasladarlle á Xunta de Galicia a solicitude de transferencia da titularidad do tramo da estrada antiga da PO-532, no lugar de Tourón, dunha lonxitude de 400 metros lineales, que ten o seu inicio no punto kilométrico 11,300 e o seu remate no 11,800, aproximadamente.

O Concello de Ponte Caldelas comprométese, no caso de que sexa transferida o seu titularidad, ao mantemento e conservación deste tramo que se converteu, tras unha actuación de mellora e urbanización acometida no 2010 pola Xunta de Galicia nun vial interior de uso do núcleo poblacional de Tourón.

O tramo atópase totalmente urbanizado trala actuación levada a cabo fai tres anos pola Consellería de Medio Ambiente, Territorio e Infraestruturas (MATI) que consistiu na construción de beirarrúas, colocación de luminarias e pavimentación que a converteu nunha travesía de uso interior.

Así, neste tramo existen varias instalacións correspondentes a servizos como auga, saneamiento, etc. o que supón que para solicitudes de conexión ou reparación das mesmas teñan que tramitarse actualmente as autorizacións sectoriales ante a Axencia Galega de Infraestruturas cos correspondentes atrasos burocráticos. O mesmo sucede coas licenzas de obras correspondentes ás edificaciones existentes a ambas marxes, que actualmente requiren para calquera reparación ou reforma unha autorización autonómica.

Para resolver esta cuestión, o Concello de Ponte Caldelas considera que logo da actuación realizada en 2010, o tramo atópase en perfecto estado, completamente urbanizado, polo que o seu mantemento municipal considérase viable. O cambio de titularidad a favor do Concello facilitaría todos eses trámites e as posibles autorizacións referentes a obras que se poidan realizar nas marxes deste tramo, que pasarían a ser de competencia da administración local.