Os padexeiros galegos participan no Campionato do Mundo de Maratón

Seis padexeiros galegos xa se encontran en Copenhaguen, cidade que acollerá o sábado e o domingo o Campionato do Mundo de Maratón Iván Alonso, Ton Campos, Diego Romero, David Manuel Mosquera, Óscar Graña e Ramón conforman a representación galega. Catro deles defenderán o título logrado o ano pasado en Roma.

Iván Alonso fixo ‘dobre’. Foi o gañador en K-1 e en K-2 xunto a Emilio Merchán. Tamén foi dobre gañador do Campionato de Europa que se disputou en mes de xuño en Portugal. En ambos os dous casos, é un dos grandes favoritos á repetir a xesta.

Ton Campos tamén gañou o Mundial de Roma en C-1 e foi terceiro en C-2. Nesta ocasión terá como compañeiro a Diego Romero en C-2. Ton Campos tamén logrou o título europeo recentemente.

Óscar Graña e Ramón Ferro levan unha ampla traxectoria deportiva, con numerosos títulos internacionais. Gañaron en Roma e tamén en Vila Verde (Portugal) e buscarán completar unha gran xesta. Parten co cartel de favoritos en C-2.

O debutante galego en C-1 será David Manuel Mosquera, do Club Ría de Betanzos, que logrou a súa praza para poder competir no control selectivo que realizou a Federación Española de Piragüismo.

O Campionato do Mundo de Maratón de Copenhaguen é a última proba da tempada. O sábado disputarase a proba de barcos individuais e o domingo o de dobres.