O obradoiro de “actividades auxiliares de almacén” rexistrou máis de 200 inscricións

Un total de 208 persoas desempregadas formalizaron a inscrición no itinerario de inserción laboral “Actividades auxiliares de almacén”, que pechou o seu prazo de solicitude o pasado 20 de setembro. Así o avanzou esta mañá a concelleira de Emprego, Martina Aneiros Barros, quen explicou que o equipo técnico do proxecto “Ferrol, punto de emprego II”, no que se enmarca esta acción formativa, xa comezou o proceso de selección dos 15 participantes que cubrirán as prazas ofertadas.

O itinerario de formación, cunha duración total de 280 horas, desenvolverase ao longo de dous meses e medio e ten previsto o seu inicio para mediados do vindeiro mes de outubro. Este curso contempla diferentes módulos: de formación específica, de práctica profesional titorizada en empresa (90 horas), e de formación transversal. Así, o obxectivo que persegue esta acción formativa é capacitar para a realización de operacións auxiliares de almacén, recepción, ubicación básica, preparación e expedición de cargas e descargas, de forma coordinada ou en equipo, baixo a supervisión dun responsable, seguindo as instrucións recibidas, e aplicando os procedementos e equipos adecuados, en condicións de produtividade e respectando a normativa de seguridade, saúde e prevención de riscos.

A edil de Emprego lembrou que “Ferrol punto de emprego II”, financiado en parte polo Fondo Social Europeo (FSE), ten como finalidade proporcionar aos beneficiarios unha cualificación profesional que lles permita acceder con mellores condicións de empregabilidade ao mercado laboral.