O IES do Milladoiro recibe un lote de 2.000 libros para a biblioteca do centro educativo

Lote de libros

O Concello de Ames vén de cederlle ao IES do Milladoiro un lote de máis de 2.000 libros procedentes dos fondos municipais destinados á biblioteca do centro educativo. O concelleiro de Educación, Bernardo Moar, desprazouse esta mañá ata o IES do Milladoiro para facerlle entrega ao seu director, Rafael Baliñas, das caixas que contiñan os volumes. O obxectivo desta cesión é contribuír a dotar a biblioteca con libros que os alumnos e alumnas poidan empregar durante o curso escolar.

Deste xeito, o Concello de Ames colabora coa dotación da biblioteca do novo centro educativo amiense, que abrirá as súas portas o vindeiro luns 16 de setembro co comezo do curso escolar. No lote de máis de 2.000 libros cedidos polo Concello inclúense clásicos e actuais da literatura galega e castelán, literatura xuvenil, libros didácticos, volumes de ensaio en galego e castelán e obras de consulta, como dicionarios ou enciclopedias.