O goberno ferrolá amplia ata mediados de setembro a instalación de terrazas no centro da cidade

O concelleiro de Economía, Facenda e Recursos Humanos, Alejandro Langtry Caínzos, informou hoxe sobre a ampliación da autorización para a instalación de terrazas nos establecementos de hostalería situados en certos tramos das rúas María, Magdalena e Pardo Baixo na primeira quincena do mes de setembro. Esta iniciativa permitirá a dinamización do sector, así como, animar as rúas do centro da cidade por un período de tempo maior gracias ás boas condicións climatolóxicas das que goza a cidade naval.

Así, os establecementos que conten coa autorización, poderán instalar as súas terrazas na vía pública todos os días, de luns a domingo, durante a primeira quincena do presente mes de setembro. Os tramos das rúas nos que os hostaleiros poderán seguir realizando a instalación de cadeiras e mesas son a rúa María, entre terra e Concepción Arenal; a rúa Magdalena, entre Terra e Rubalcava; e a rúa Pardo Baixo. Os criterios seguidos pola Administración ferrolá para seleccionar os lugares onde é posible instalar terrazas, atenden ás recomendacións realizadas pola Policía Municipal co obxectivo de minimizar a alteración do tráfico rodado.