O Ágora convértese no centro nacional da fotografía en setembro

A tenente de alcalde de Cultura, Ana Fernández, presentou esta mañá as I Xornadas PhotoÁgora acompañada polo director da iniciativa, Gabriel Tizón, que organiza o Concello e que contará coa presenza de catro dos fotógrafos máis prestixiosos do panorama internacional.

Así, PhotoÁgora nace coa filosofía de compartir e educar contando coa participación de grandes profesionais do sector que achegarán as súas experiencias aos participantes. “A Ágora é un centro no que a formación ocupa un lugar preferente por iso este proxecto encaixa á perfección xa que nace coa filosofía de compartir e formar a través da fotografía. Por este motivo, contaremos coa presenza dos mellores, profesionais de recoñecido nivel internacional como son Ouka Leele, José Manuel Navia, Chema Madoz e J. M. Castro Prieto que durante catro xornadas nos explicarán o porqué do seu éxito”, explicou o tenente de alcalde.

PhotoÁgora arrancará este sábado, día 7 de setembro, coa masterclass de Ouka Leele. Seguirano, o día 14, José Manuel Navia; o 21, Chema Madoz; e o 28, Manuel Castro Prieto. Haberá 40 prazas por taller e a inscrición levarase a cabo na páxina web www.photoagora.es. “Unha vez máis a Ágora converterase no centro de todas as miradas, de todas as fotografías”, recordou.

Ademais, hoxe tamén se inaugurou a exposición que se organizou con motivo das I Xornadas PhotoÁgora que baixo o lema A cultura nos barrios expón a obra de Óscar Palomares (Barcelona), gañador do concurso internacional PhotoÁgora coa serie Graza, tradición e cultura; e a dos dous finalistas: José Cadaveira (británico afincado na Coruña) con Rúa Barcelona de pé e Luis Davilla (Madrid) con Wallstreet e arredores en Manhattan.

“Ouka Leele é unha das protagonistas do batifondo madrileño dos oitenta, é un artista multidisciplinar e con estilo inconfundible que fusiona fotografa con debuxo e pintura alcanzando uns resultados espectaculares. José Manuel Navia é un fotoxornalista que traballa como freelance nas axencias Co ver e a francesa Vu, colaborando ademais co País Semanal, La Vanguardia e National Geographic na súa edición española. Chema Madoz é un dos fotógrafos máis recoñecidos e recoñecibles polo seu persoal estilo. A súa obra podería cualificarse como evocadora, partindo dun obxecto cotián, transformándoo naquilo que lle suxire e dotándoo dunha sorprendente beleza. Castro Prieto é un dos grandes mestres da fotografía española. Ao igual que Madoz, dota ás súas imaxes dunha poderosa evocación onírica que invita ao espectador a imaxinar historias das xentes que habitan as súas paisaxes”, concluíu Fernández.