Éxito rotundo da clase maxistral de Silvia Mas en Sanxenxo

A campioa de España absoluta de Optimist Silvia Mas ofreceu unha clase maxistral aos mellores regatistas de Optimist de Galicia e fíxoo no Real Club Náutico de Sanxenxo grazas á iniciativa posta en marcha por Movistar e a Federación Galega de Vela, que permitirá que os mellores regatistas do mundo se acheguen ata a costa galega para compartir as súas experiencias cos afeccionados á vela, ao wíndsurf e ao kitesurf.

A chuvia non impediu que os 20 mozos de nove a 14 anos gozasen dunha xornada que comezaba ás 10:00 horas, cando daba comezo unha clase teórica na que Silvia Mas explicou os mozos como afrontar unha regata. A campioa de España absoluta de Optimist non só fixo referencia a aspectos puramente técnicos, senón que centrou gran parte da súa exposición na actitude que o regatista ha de ter na auga e, sobre todo, a importancia da estratexia durante a competición.

Tras a clase teórica chegaba a hora da verdade. Acompañados polos seus adestradores, os asistentes achegábanse xunto a Silvia Mas á rampla de vela lixeira para descargar os barcos e preparalos para saír á auga, onde afrontarían dúas sesións de adestramentos: a primeira, dende as 13:00 horas ata as 14:30 horas e a segunda a partir das 15:30 horas.

O mellor da frota galega de Optimist, no clínic de Silvia Mas

Os regatistas máis fortes da frota de Optimist galega non quixeron perderse a oportunidade de aproveitar os coñecementos de Silvia Mas e mostra diso é que a Federación Galega de Vela recibiu máis solicitudes que prazas dispoñibles.

Finalmente acudiron á Máster Class regatistas de Vigo, Combarro, Canido, Vilagarcía e Sanxenxo, destacando de entre todos a presenza de Martín Wizner, Jaime Lusquiños ou María Diz -número dous e número cinco do ranking galego respectivamente-. Outros dos protagonistas do día foron Santi Moreno e Alejandro Sanmartín.

Dende o primeiro momento Silvia Mas foi consciente do nivel dos asistentes xa que “nos meus anos de Optimist e nos actuais en 420 os meus grandes rivais na xeral era e son galegos”. A catalá non perdeu nin un minuto durante as súas explicacións e resolveu todas e cada unha das dúbidas formuladas tanto en terra coma na auga xa que, tal e como comentaba: “quero ensinarlles todo o que aprendín nos meus anos no Optimist: tácticas, técnicas, manobras… Todo o que eu facía e todo o que queiran saber”.

Para os mozos, esta foi unha oportunidade única e irrepetible, como moitos dos asistentes explicaban minutos antes de saír á auga xa que permite que os grandes regatistas da frota galega de Optimist melloren aspectos esenciais como o trimado do barco ou as viradas.

A previsión é que a xornada finalice ao fío das 19:00 horas, tras dous adestramentos na auga e unha nova sesión teórica na que se revisarán os puntos clave do día.

A quenda de Fernando Echávarri e Iker Martínez

O próximo fin de semana será un dos máis intensos dos propostos por Movistar e a Federación Galega de Vela e é que chega a quenda dos campións olímpicos e vueltamundistas Fernando Echávarri e Iker Martínez.

O primeiro deles estará o sábado, 5 de outubro, en Vilagarcía de Arousa mentres que o Iker Martínez sairá a escena en Praia América, en Nigrán (Pontevedra) o próximo domingo día 6

Aínda é posible que os afeccionados á vela e aos catamaráns se anoten a estas novas clases maxistrais tan só visitando a web www.vive.movistar.es, onde encontrarán toda a información necesaria.