Culleredo suxire vías alternativas ante a coincidencia das obras na N-550 e o comezo do curso escolar

O Concello de Culleredo recorda a recomendación de uso das vías de alta capacidade ante o corte da Nacional-550 no Portádego polas obras de Emalcsa ante o comezo mañá do curso escolar, o que previsiblemente incrementará a circulación pola rede viaria cullerdense.

O goberno municipal apunta que o uso da autoestrada AP-9 ou a Terceira Rolda para dirixirse á cidade da Coruña, mesmo para os residentes no Burgo ou Acea de Ama, aliviou a semana pasada o tráfico en Fonteculler e a avenida do Portádego de forma notoria. Por iso pide aos condutores que mañá sigan facendo o mesmo, especialmente nas horas de entrada e saída dos colexios, que é cando se nota unha maior carga de circulación.

Para o caso de alumnos dos centros de ensino radicados no municipio, o Concello recomenda, nos casos que sexa posible, acudir a pé. Tamén aconsella saír con tempo dos domicilios para evitarse trastornos.

O alcalde en funcións, José Ramón Rioboo, explica que a Policía Local de Culleredo seguirá co seu plan de regulación e vixilancia de tráfico, mañá mesmo de forma “máis exhaustiva” para apoiar o inicio do curso escolar. A presenza dos axentes é continua na AC-211, en Fonteculler, onde se concentra unha maior circulación polo corte do Nacional 550.

O goberno municipal espera que as obras de Emalcsa poidan finalizar esta semana. A empresa explicou que os traballos avanzan a moi bo ritmo polo que se podería reabrir a estrada mesmo nos prazos previstos.

Rioboo agradece aos veciños a súa comprensión polas inevitables molestias que xera esta actuación de Emalcsa, que redundará nunha mellora do abastecemento para os veciños de a cidade e da área metropolitana.

Acondicionamento da parcela xunto a Radio Culleredo

O Concello de Culleredo sinala que a parcela situada no Portádego xunto a Radio Culleredo, a pé do Nacional 550, será acondicionada unha vez concluídos os traballos. Na actualidade, este terreo serve para o abasto de material por parte da empresa que leva a cabo as obras encargadas por Emalcsa.

O goberno local solicitou que posteriormente sexa axeitada para que quede en boas condicións. Polo de pronto non se prevé alí ningunha actuación dado que se confía que proximamente a Xunta de Galicia comece a construción do necesario centro de saúde.