Comezan a substituirse as lousas nas rúas peonís do Burgo

Substitución das lousas

O goberno de Culleredo comezou os traballos de renovación do pavimento das rúas peonís do Burgo. A empresa adxudicataria da obra xa visitou onte a zona e comezou o traslado de material para iniciar na mañá de hoxe a actuación.

Os traballos empezaron na rúa Hersa, nas inmediacións da confluencia coa cale Sanjurjo de Carricarte, que será obxecto da mellora unha vez finalizada na primeira. Os operarios proceden á substitución das baldosas danadas ou levantadas por unhas novas e así conferir á rúa o aspecto e seguridade necesaria.

O desenvolvemento da obra levou o Concello de Culleredo a establecer un plan especial de tráfico, xa sinalizado na zona. A rúa Sanjurjo de Carricarte convértese de forma provisional nunha vía de sentido único, dende a avenida de Ribados ata a praza de Galicia. Esta é a alternativa que deben tomar os residentes para o acceso aos garaxes. Os danos nas baldosas foron causados polo paso do tempo e pola circulación de vehículos de gran peso. Isto levou ao Concello a precintar os colectores soterrados na unión de Hersa e Sanjurjo de Carricarte e crear unha zona específica para o depósito de lixo na avenida de Ribados.

Non obstante, os veciños da zona alertaron de que existen persoas que deixan as bolsas do lixo na rúa Hersa, xunto aos colectores, a pesar dos avisos que alí constan. Isto constitúe unha conduta incívica que o Concello procederá a sancionar de inmediato de persistir. En concreto, trátase dunha conduta tipificada como infracción na ordenanza municipal de protección do medio:

INFRACCIÓNS

Sección 1. ª: infraccións ao réxime de residuos.

Art.º 288. -En todo caso, constituirán:

1. Infraccións leves: cando a conduta sancionada afecte ás operacións de recollida de residuos.

Sección 2. ª: infraccións ao réxime de limpeza urbana.

Art.º 289. -En todo caso, constituirán:

1. Infraccións leves:

Botar ou depositar residuos, desperdicios e lixos nas vías públicas ou privadas, en os seus accesos e soares, ou en terreos valados ou sen valar. Cada unha destas sancións ten aparellada unha sanción de ata 750 euros, polo que quen cometa esta conduta podería ser sancionado con ata 1.500 euros.