Comeza o prazo de inscrición no programa de actividades extraescolares “Artellando”

A Concellería de Educación do Concello de Ferrol, que dirixe Susana Martínez Galdós, informou de que hoxe abre o prazo de inscrición para participar no programa de actividades extraescolares “Artellando”, dirixido ao alumnado de Educación Primaria dos centros de ensino públicos e concertados de Ferrol. Os interesados en participar poderán presentar as súas solicitudes no Rexistro Xeral do Concello de Ferrol, en horario de 09:00 a 14:00 horas, dende hoxe ata o mércores 25 de setembro (ambos inclusive).

Os obradoiros que integran este programa educativo municipal, que serán de carácter gratuíto, desenvolveranse todos os venres dos meses de outubro e novembro. A selección de participantes será mediante a orde de presentación das solicitudes e o número máximo por obradoiro será de 24 –distribuídos en grupos de 12 por taller-. As listas provisionais de admitidos e de excluídos publicaranse o vindeiro 1 de outubro no taboleiro de editos do Concello de Ferrol e na páxina web da Concellería de Educación: www.ferrol.es/educacion. Posteriormente, entre os días 2 e 3 de outubro os admitidos para participar neste programa educativo municipal deberán confirmar a súa praza mediante a presentación no Negociado de Educación do Concello da folla de confirmación.