Cedeira impulsa o uso de enerxías renovables nos edificios públicos

O Concello de Cedeira continúa adiante co seu plan municipal de impulso do uso de enerxías renovables e actuacións de eficiencia enerxética en edificios públicos. Un programa que iniciaba o ano pasado no pavillón polideportivo e na escola infantil e que proseguirá este exercicio cunha nova intervención nas instalacións deportivas e na Biblioteca Municipal. En concreto, o Concello procederá á substitución da caldeira de gasóleo por outra de biomasa no pavillón e renovará as lámpadas na pista polideportiva por outras de tecnoloxía led, de alto rendemento lumínico. Así mesmo, instalará novos ventanais no centro de lectura. Tres proxectos valorados en preto de 90.000 euros que a semana pasada quedaban adxudicados na correspondente mesa de contratación.

Nesta liña, o Concello destaca que a implantación paulatina de enerxías renovables no día a día da Administración local constitúe un obxectivo estratéxico para o goberno cedeirés.

As tres intervencións terán custo cero para as arcas locais grazas á liña de axudas do Fondo de Compensación Ambiental procedente da Xunta de Galicia, que cubrirán o 100% de o investimento necesario. Un fondo que sufraga intervencións tendentes a impulsar a eficiencia enerxética ou o uso de enerxías renovables en municipios afectados pola instalación de aeroxeradores ou liñas de conexión, como é o caso de Cedeira. E, nos tres casos descritos, traerán consigo un importante aforro enerxético -de entre un 30 e un 60%- e unha consecuente rebaixa na factura da subministración eléctrica municipal.

Continuidade

As actuacións previstas súmanse ás executadas o ano pasado. Nun e outro caso, con dous obxectivos: reducir o gasto corrente que xera o consumo enerxético nas instalacións municipais e contribuír á conservación dos recursos naturais. Así, en 2012, o Concello procedía á instalación de paneis de enerxía solar térmica no pavillón polideportivo para producir a auga quente necesaria para a piscina cuberta, reducindo así o consumo de propano que se empregaba ata a data como combustible nas instalacións. Mentres que na Escola Infantil substituía a caldeira de gasóleo por outra de biomasa.