Axudas municipais para libros e comedor a tódolos nenos e nenas ourensáns que cumpren os requisitos establecidos

“Se non fose polo enorme esforzo deste goberno municipal, 800 nenos e nenas da cidade non terían axudas de libros nin comedor”. A concelleira de Benestar Social, Marga Martín, confirmaba esta mañá aos medios de comunicación a concesión de axudas do Concello de Ourense para libros e comedor escolar, aprobadas na Xunta de Goberno Local. O goberno municipal destinará un total de 358.305 euros nunha competencia “que lle corresponde á Xunta de Galicia, pero que asumimos nós porque eles non cumpren”.

Así, un total de 801 nenos e nenas da cidade recibirán axudas de material escolar, libros ou comedor para o curso 2013-2014. En total, foron concedidas as 516 axudas a comedor que cumprían os requisitos, das 730 solicitudes presentadas (285 axudas a centros públicos e 231 a centros concertados), nas que o Concello aporta 326.620 euros. No tocante as axudas de libros, 285 nenos e nenas cumprían co perfil, das 502 solicitudes presentadas (65 axudas a 4º de EI, 111 a 5º de EI e 109 a 6º de EI), cunha aportación de 31.685 euros.

A concelleira fixo fincapé no retraso na concesión destas axudas, motivado polo elevado número de solicitudes recibidas, 1.232 “máis solicitudes ca nunca”, segundo Marga Martín.

Cuantía das axudas e requisitos

As axudas para a adquisición de libros de texto e gastos en comedor escolar están dirixidas a familias do Concello de Ourense que teñan menores ao seu cargo escolarizados en centros públicos ou concertados para o próximo curso 2013/2014. As de libros e material escolar están dirixidas a alumnos de Educación Infantil (3, 4 e 5 anos), e as de comedor a escolares de Infantil, Primaria e Secundaria Obrigatoria, con praza de comedor escolar no centro.

As axudas en especie para libros e material escolar son as seguintes:

– 1º de Educación Infantil (3 anos). 90 euros por alumno

– 2º de Educacióm Infantil (4 anos): 110 euros por alumno

– 3º de Educación Infantil (5 anos): 125 euros por alumno

As axudas para comedor escolar cubrirán a totalidade do custe da praza nos centros públicos e ascenderán a 45 euros ao mes nos centros concertados.

Os requisitos que deben cumprirse para obter estas axudas son os seguintes:

– Estar empadroados no Concello de Ourense, con 3 meses mínimo de  antigüidade, todos os membros da unidade de convivencia.

– Estar matriculados en centros públicos ou concertados. No caso das axudas para libros, en Educación Infantil, e no das axudas de comedor, nos ciclos de Infantil, Primaria ou Secundaria Obrigatoria e ter praza de comedor escolar no centro.

– Non superar 3.500 euros de renda per capita anual. Computarase un membro máis en caso de presentar algún deles unha discapacidade igual ou superior ao 33% e tamén no caso de ser familia monoparental.