As delegadas empresariais ourensanas valoran positivamente os lazos de colaboración xerados na visita a México

Unha das reunións mantidas en México

A parte empresarial da delegación ourensana en México destacou a boa sintonía xurdida nos distintos encontros empresariais realizados, nos que deron a coñecer tanto o tecido empresarial da provincia coma o interese das empresas ourensanas en entaboar contactos comerciais.

Tanto Yolanda López, xerente da Asociación de Empresarios do Polígono de San Cibrao, como María Fernández, responsable do departamento de Promoción Exterior da Confederación Empresarial, levaron a cabo unha completa axenda entre as cidades de México DF e Tlalnepantla de Baz. En ambas as dúas localidades as representantes empresariais realizaron presentacións e contactos en entidades como a Unión Mexicana de Empresarios Galegos, Pexga México, a Oficina Comercial e Económica da Embaixada de España en México e ProMéxico. Igualmente, as organizacións empresariais máis representativas de Tlalnepantla de Baz realizaron encontros coas representantes ourensanas, os que se encargaron tamén de levar a cabo unha prospección de mercado e contactos con distribuidores.

En cada un destes organismos, tanto Yolanda López coma María Fernández, encargáronse de realizar unha presentación das empresas ourensanas interesadas no mercado mexicano, utilizando para iso a información facilitada polas propias firmas, que tamén se distribuíu entre as mexicanas interesadas neste mercado (dosieres, catálogos, memorias usb…). Ao redor de 40 empresas ourensanas de diversos sectores solicitaran a intermediación das dúas representantes empresariais na comitiva do Concello para realizar contactos, buscar provedores ou distribuidores, ofrecer servizos e darse a coñecer entre o colectivo empresarial mexicano. Neste sentido, tras a primeira presentación na Plataforma Pexga México, esta encargarase de identificar posibles contactos clave para cada empresa, e deste modo posibilitar as relacións comerciais.

Todas as reunións e presentacións nas distintas entidades empresariais e organismos oficiais estaban destinadas a proporcionar o fluxo de información e colaboracións necesarias para tecer unha rede de contactos que perdure no tempo e que poida ser fortalecida de aquí en diante ata alcanzar acordos comerciais. Neste sentido, María Fernández destacou ao seu regreso a enorme sintonía e grao de cooperación que se alcanzou con organismos como ProMéxico e o seu Director Executivo de Promoción Internacional, Carlos Fuentes Arriaga. ProMéxico é a axencia de promoción internacional do goberno mexicano que atende cuestións de exportación, importación e investimento estranxeiro e facilita así mesmo os investimentos de mexicanos no exterior; o organismo conta ademais cunha sucursal en Madrid que foi posta a disposición da CEO para realizar todo tipo de xestións. Alí foi presentada a Oficina de Atracción de Investimento Estranxeiro desenvolvido no marco do proxecto ECICII de cooperación transfronteiriza España-Portugal.

Nesta mesma liña logrouse a colaboración directa do ICEX en México, situado na Embaixada de España en México, que traballa cuestións relacionadas co investimento e o comercio internacional entre os dous países, así como as relacións económicas e empresariais. O seu Conselleiro Económico e Comercial, Francisco Garzón Morales, presentou tamén as posibilidades que ofrece o país centroamericano, destacando como principal sector de oportunidade a automoción e auxiliares, unha boa opción para aquelas empresas ourensanas capaces de integrarse na cadea de valor da automoción.

Seguindo o mesmo esquema que nos anteriores, tamén se celebraron encontros empresariais na propia cidade de Tlalnepantla de Baz, irmandada con Ourense, nos que participaron as entidades Comerciantes e Empresarios Unidos de Tlalnepantla e Asociación de Empresarios de Tlalnepantla. Nun deles deuse a coñecer un proxecto para esta cidade mexicana denominado Centro Urbano Rexional, que levará consigo a participación de empresas de materiais de construción, xestión de residuos, canle contract, etc. Trátase dunha iniciativa de reordenamento urbano e rehabilitación que xestiona o Concello para o que abren a participación a empresas ourensanas que, en colaboración con outras mexicanas, poidan estar interesadas en formar parte. Por outro lado, da reunión con estas entidades xurdiu a iniciativa de realizar un catálogo de produtos e servizos das empresas destas cidades irmandadas con Tlalnepantla de Baz, a xeito de directorio para que os empresarios poidan coñecer con máis detalle a oferta en sectores concretos, e establecer colaboradores ou partners para poder acceder a cada un dos mercados.

Ao longo da semana, María Fernández e Yolanda López acudiron tamén a varias reunións e xantares de traballo con empresarios galegos radicados en México, pertencentes a UMEGAL (Unión Mexicana de Empresarios Galegos). Nestes encontros fíxose patente por ambas as dúas partes a necesidade de establecer lazos mutuos de cooperación que favorezan e faciliten as relacións comerciais das empresas ourensanas en México. Deste modo, ábrese outra canle máis de acceso e apoio neste país, tanto con empresarios galegos que operan nel, coma cos mexicanos, reforzando así a axuda ao empresario en destino. A partir de aquí, quedou instaurada unha nova liña de colaboración máis operativa e próxima, cos auténticos ‘embaixadores empresariais’ de Ourense e de Galicia fóra das nosas fronteiras. María Fernández destacou a grata acollida da proposta de colaboración por parte dos empresarios galegos en México, cos que ademais de continuar traballando para afianzar esta alianza, se manterán encontros empresariais na sede da CEO, cando regresen á súa terra, polo menos unha vez ao ano. Entre os participantes destacaban, entre outros, empresarios influentes como Liño de Prado Sampedro, Presidente de Consello de Administración de Zara México, Antonio Cortés Ogando, Presidente de UMEGAL (Unión Mexicana de Empresarios Galegos), Fernando Ribadeneyra, presidente de Avogados Ribadeneyra, Treviño & Domingo Campo; ou Sor Salud Conde Nieto, xestora dos colexios Miraflores, presentes en varios países.

Por outro lado, a visita a México foi aproveitada tamén para dar continuidade ás xestións comezadas nos grupos de exportación dos sectores canle contract e agroalimentario, que a CEO promoveu no marco do programa europeo ECICII e que se constituíron a comezos do verán. Para iso, mantivéronse entrevistas presenciais co arquitecto Gonzalo Pérez Vázquez, do Grupo Risco, e con Pablo Pedregal, de Geo4, participantes neste proxecto e cos que xa se realizaran contactos por videoconferencia por parte dos membros do grupo de exportación de canle contract. Isto serviu para avanzar na presentación de novas propostas de valor para estes grupos e expoñer os pasos previos necesarios para acceder ao mercado mexicano, nos que empresas ourensanas estaban especialmente interesadas.

Outro aspecto que no que incidiron Yolanda López e María Fernández ao seu regreso foi a prospección de mercado realizada para a identificación e o contacto con distribuidores para produtos ourensanos en México, por parte de empresarios do sector da alimentación interesados en abrir mercado no país azteca. Ambas as dúas valoraron como moi positivos os contactos realizados con importantes representantes de empresas distribuidoras de produtos españois de alimentación e líderes de opinión en temas de gastronomía e enoloxía como Pilar Meré. Ademais, reportaron informes de posicionamento e competencia destes produtos en cadeas de referencia como Sam’s Club e Walmark e nas distribuidoras Alianza e La Europea (esta última a principal distribuidora de produtos españois en México). Nesta liña, tamén realizaron contactos concretos para outras empresas ourensanas de diversos sectores, que de xeito particular comunicaron os interesados. Do mesmo modo, asociacións empresariais como a que agrupa os graniteros ou os inmobiliarios na provincia, trasladaron información para darse a coñecer entre os empresarios mexicanos.