Apertura do prazo de inscrición nas Aulas de Igualdade de Ourense

As Aulas de Igualdade do Concello de Ourense, cuxo prazo de inscrición está aberto dende hoxe, luns 30 de setembro,  propoñen para o curso 2013-2014 un programa que consta de 5 aulas independentes, cunha duración de 30h cada unha e polas que se outorgará certificado de asistencia.

A concelleira de Igualdade, Marga Martín, expuxo o programa completo esta mañá no Salón de Plenos, lembrando que as Aulas son “un espazo formativo aberto no que poder compartir ideas e inquedanzas de xeito lúdico  e vivencial, a través de actividades grupais, na que o asistente é o protagonista, promovendo relacións equitativas de xénero respectuosas coa diversidade”.

O obxectivo das Aulas é previr a violencia de xénero promovendo relacións igualitarias entre mulleres e homes e avaliar os retos sociais que quedan por diante.

Os cursos que se ofertan nas “Aulas” son os seguintes:

-“Do teatro da vida” do 7 de outubro ao 18 de novembro, luns e mércores de 17.30h a 20.00h. Inclúe dous obradoiros “Espellos de xénero” e “Psicodrama da vida cotiá”

-“Fotografía en igualdade” do 12 de novembro  ao 19 de decembro, martes e xoves de 17.30h a 20.00h, que inclúe os obradoiros “Laboratorio fotográfico: Unha práctica de empoderamento” e “Visión e enfoques de xénero a través da fotografía”

-“Herbas medicinais” do 7 de xaneiro ao 13 de febreiro, os martes e xoves de 17.30h a 20.00h, cos obradoiros “As herbas medicinais para o coidado do corpo” e “Manual de primeiros coidados: corpo, seducción, amor e igualdade”

-“Masaxe, relaxación e sexualidade”, do 20 de xaneiro ao 26 de febreiro, os luns e mércores de 17.30h a 20.00h, e inclúe os obradoiros “Séntete, goza e reláxate” e “Sexualidade e efectividade. Un camiño por percorrer”.

-“Obradoiro de movemento”, do 25 de febreiro ao 8 de abril, os martes e xoves de 17.00h a 19.30h, “Corpos en movemento: danza e comunícate” e “Sendas. Trazando proxectos de vida”

As “Aulas” posúen unha natureza independente e intégranse en dous bloques temáticos a desenvolver en varios obradoiros. Un bloque traballará, de xeito máis práctico, o relacionado co corpo e o autocoidade e o outro céntrase no enfoque psicoafectivo e emocional, tentando suscitar unha reflexión sobre como a través das experiencias cotiás podemos incorporar actitudes, hábitos e condutas favorecedoras da autoestima e o benestar e, polo tanto preventivas do uso da violencia no patrón de relacións entre mulleres e homes.

Todas aquelas persoas interesadas en participar nalgunha das 5 aulas propostas pola Concellería poden solicitar información e formalizala súa inscrición na Concellería de Igualdade, na rúa do ensino 24, cun correo electrónico ao aderezo concelleriamuller@ourense.es ou no teléfono 988 393 191