AFAL ofrece información sobre o alzheimer en hospitais e a pé de rúa no centro de Ferrol

AFAL Ferrolterra sairá á rúa durante esta semana para informar a cidadanía sobre o alzheimer, dar a coñecer os servizos que a entidade presta a enfermos e familiares e, ao mesmo tempo, solicitar a súa colaboración económica para continuar co labor desenvolvido. Para iso, a presidenta da asociación, Milagres Prieto, informou de que AFAL instalará mañá martes, 17 de setembro, mesas informativas e petitorias no Complexo Hospitalario Arquitecto Marcide e no Hospital Naval e, o mércores, a acción levarase a cabo na zona urbana de Ferrol (en diferentes puntos como a Avenida de Esteiro, o barrio de Canido ou nas inmediacións do Hotel Suízo, o Casino ou o Avenida). O primeiro día, AFAL estará presente entre as 9,30 e as 13 horas e, o segundo, entre as 10 e as 14 horas.

Esta iniciativa enmárcase no programa de actividades deseñado por AFAL Ferrolterra para conmemorar, o próximo 21 de setembro, o Día Mundial do Alzheimer. Neste sentido, Milagros Prieto explicou que AFAL concentra os seus esforzos en visibilizar a enfermidade e conseguir que o Alzhéimer estea na vida cotiá da cidadanía durante todo o mes de setembro a través das actividades previstas, máis alá de limitarse a unha única xornada.