A Semana Europea da Mobilidade permite achegar o PMUS aos cidadáns

Begoña Freire presentando a iniciativa

A concelleira de Tráfico e Mobilidade, Begoña Freire, presentou esta mañá a Semana Europea da Mobilidade, unha iniciativa onde o Concello da Coruña ten unha participación moi activa e na que se aproveitará para continuar coa aposta do Goberno municipal por achegar aos cidadáns o Plan de Mobilidade Urbana Sostible (PMUS), que agora se encontra en fase de elaboración.

A Semana Europea da Mobilidade empeza hoxe, luns 16 de setembro, e prolongarase ata o próximo domingo, día 22. O Concello sumouse un ano máis a esta celebración, que nesta edición coincide ademais coa elaboración do PMUS. Begoña Freire destacou durante a presentación da Semana Europea da Mobilidade, realizada na carpa informativa que estará instalada durante estes sete días no Obelisco, que é unha “grande oportunidade” para seguir co obxectivo de “facer a todos os coruñeses partícipes do Plan de Mobilidade Urbana Sostible”. Neste sentido, a concelleira invitou a unha reflexión colectiva para entre todos mellorar e achegar novas suxestións ao documento, sobre todo agora que se encontra en fase de redacción.

“É moi importante que os coruñeses e as coruñesas teñan un papel protagonista no PMUS. Dende o Concello debemos concienciar os cidadáns sobre a repercusión que as decisións que tomen relacionadas coa mobilidade teñen na calidade do aire, o medio e a calidade de vida da cidade. Todas estas melloras son as que estamos a recoller agora no primeiro Plan de Mobilidade da historia desta cidade”, destacou a responsable municipal, quen recordou que para participar no PMUS se pode encher un cuestionario na páxina web www.coruna.es/pmus, ou ben chamar ao teléfono 981 167 317.

A concelleira de Tráfico e Mobilidade recordou que nesta mesma liña de participación se inclúe un calendario completo de reunións con colectivos sociais, veciñais e de comerciantes de todos os barrios da cidade. En total, o Concello ten previsto entrevistarse con 150 asociacións para recoller as súas propostas ao PMUS, un espírito participativo que se completa con outras iniciativas, como o barómetro da mobilidade (enquisas telefónicas organizadas con rigorosos procedementos demoscópicos); a propia enquisa online (www.coruna.es/pmus), na que xa participaron aproximadamente 500 persoas e a súa alternativa mediante teléfono (981 167 317); e as enquisas a usuarios do transporte público efectuadas a pé de rúa.

Begoña Freire afirmou que dende o seu comezo en 1998 o impacto da Semana Europea da Mobilidade se mantivo en constante crecemento tanto en Europa coma no resto do mundo. Trátase dunha campaña de sensibilización sobre a mobilidade urbana sostible, coa que se pretende difundir e concienciar a toda a sociedade da importancia que para o medio supón o uso dos medios de transporte máis sostibles nos desprazamentos habituais, tanto a pé coma en bicicleta e transporte público.

Este proceso de sensibilización leva consigo uns hábitos que hai que ir incorporando paulatinamente e que definirán un ámbito máis humano das cidades. Por este motivo, a responsable municipal de Mobilidade destacou o completo programa de actividades organizado polo Concello da Coruña e que se levará a cabo durante esta semana. “O noso obxectivo é que a cidade se mova na dirección correcta e, para conseguilo, preparamos unha serie de actividades onde priman a información e a participación, pois son dous elementos estratéxicos para, entre todos, mellorar a mobilidade na nosa cidade”, explicou Begoña Freire, quen informou das principais accións previstas con motivo da Semana Europea da Mobilidade:

– A Coruña: sostible e segura. Trátase dunha exposición sobre a Semana Europea da Mobilidade e sobre o PMUS que se poderá visitar dende hoxe e ata o próximo domingo na carpa instalada no Obelisco. Con esta iniciativa, os asistentes poderán participar na elaboración do PMUS e, ao mesmo tempo, coñecer as claves para moverse dunha forma máis segura pola cidade.

– Camiña Coruña. Son percorridos a pé dende os barrios ao centro da cidade -o punto de chegada é sempre o Obelisco-. O obxectivo é que os cidadáns coñezan a duración de cada traxecto e identifiquen as mellores rutas para desprazarse. As persoas interesadas en participar poden apuntarse na web www.coruna.es/pmus ou no punto de saída de cada percorrido se aínda hai prazas dispoñibles. A primeira ruta será hoxe dende a praza Das conchiñas (Agra del Orzán); a segunda está prevista para o mércores, 18 de setembro, dende o mercado de Elviña; e a terceira, o venres día 20, dende o parque de San Diego (Vos Castros). Os tres percorridos empezarán ás 18.30 horas.

– Pedalea Coruña. Dirixido a maiores de 16 anos, trátase de circuítos guiados en bicicleta. Os participantes, que contarán co apoio de monitores especializados, poderán utilizar a súa propia bicicleta ou ben usar as de Bicicoruña. Tanto en Pedalea Coruña coma en Camina Coruña, os participantes tamén colaborarán na construción dos mapas de mobilidade sostible da Coruña. A fórmula para apuntarse é a mesma que en Camina Coruña e haberá outros tres percorridos:

– Martes, 17 de setembro. Os Rosales-Obelisco. Saída dende a estación de Bicicoruña na rúa Manuel Azaña ás 18.30 horas.

– Xoves, 19 de setembro. Matogrande-Obelisco. Saída dende a estación de Bicicoruña na rúa Enrique Mariñas ás 18.30 horas.

– Sábado, 21 de setembro. Estación de tren-Obelisco. Saída dende a estación de Bicicoruña situada fronte á terminal de San Cristóbal ás 12.00 horas.

– En busca dos bos peóns. Durante esta semana e cada día nun barrio diferente, premiarase peóns que teñan un comportamento cívico e que contribúan a mellorar a mobilidade e a convivencia na cidade.

– Concursos de vídeo e fotografía. A través do perfil de Facebook do PMUS (www.facebook.com/pmusacoruna) convócase un concurso de microvídeo e outro de fotografía onde a temática será a Semana Europea da Mobilidade. O obxectivo é mellorar a mobilidade na Coruña.

– Dálle aire á túa cidade. Será unha festa final cun circuíto educativo de seguridade vial, un simulador de condución, talleres de pintura e xogos para nenos, música, e entrega de premios, entre outras sorpresas. A celebración será o sábado, 21 de setembro, na praza de María Pita, entre as 11.00 e as 18.00 horas. Para máis información, pódese consultar a páxina web www.coruna.es/pmus.

Os participantes nas distintas accións organizadas con motivo da Semana Europea da Mobilidade contarán cunha tarxeta de 20 viaxes gratis no transporte público e o sábado sortearase entre todos os participantes unha bicicleta pregable.