A Policía Municipal denunciou a cinco infractores en diversos controis preventivos de alcoholemia

A Xefatura de Policía Local de Ferrol informou hoxe do resultado de varios controis preventivos de alcoholemia levados a cabo entre os condutores que circulaban polo termo municipal na noite do pasado venres día 20 e na madrugada do sábado 21 de setembro. De xeito máis concreto, os axentes realizaron estes controis, enmarcados dentro do programa de Seguridade Viaria, na praza de Galicia, estrada Trinchera,  estrada de Catabois e na de Castela.

En canto aos resultados de dita campaña, os gardas locais controlaron un total de 49 vehículos, dando como resultado que cinco condutores deron positivo, o que supón un 10,20% dos examinados. En canto ao sexo do total de condutores examinados, 38 eran homes, o que supón un 77,55%, e 11 mulleres, un 22,44%. Así, todos os condutores que deron positivo eran varóns cunha idade media de 38 anos. A taxa máis alta detectada no control foi de 0,78 mg/l polo que se tramitaron dilixencias ao xulgado por un presunto delito contra a seguridade viaria.

Ademais, foron cursadas catro denuncias administrativas por conducir baixo os efectos do alcohol cunha taxa non superior aos 0,60 mg/l establecidos. Así mesmo, foron inmobilizados no depósito municipal tres dos cinco vehículos intervidos.