A Oficina de Turismo de Cedeira rexistrou máis de 7.400 visitantes durante o verán

Malia o actual contexto de crise económica, as cifras de visitantes que acudiron este ano á Oficina Municipal de Turismo de Cedeira non só non minguaron respecto ao 2012 senón que se incrementaron notablemente. Así, entre os meses de xuño e agosto a cifra elevouse a 7.436, un 7,2% máis que no mesmo período do exercicio pasado. Por meses, as instalacións municipais atenderon en xuño 695 consultas (fronte aos 455 de xuño do 2012); ata 2.491 en xullo (por 2.095 do 2012) e 4.250 en agosto (3.893 o ano pasado). Un balance moi positivo para a Administración local, dado o forte peso do turismo na actividade económica da vila.

Así, a memoria da Oficina constata que as consultas atendidas se centraron maioritariamente en dar resposta ao interese dos visitantes polos lugares de visita obrigada, aloxamentos, gastronomía típica, rutas de sendeirismo, actividades culturais ou festas ou recursos turísticos destacados como San Andrés de Teixido, a Garita dá Herbeira, a Serra da Capelada ou o Castelo da Concepción.

Cabe recordar que a Oficina se mantén aberta durante os doce meses do ano, proba do tirón turístico do municipio. En canto á procedencia dos turistas, no ámbito nacional destacan os chegados de Madrid, Cataluña e Andalucía. Na esfera internacional, foron maioritarios os procedentes de Inglaterra, Irlanda, Francia, Italia e Alemaña. Non obstante, houbo gran variedade de nacionalidades, como estadounidenses, finlandeses, australianos, austríacos…

O horario de atención ao público da Oficina Municipal de Turismo é de 10,30 a 14 e de 17 a 20 horas de luns a venres e de 11 a 14 horas os sábados. Na época estival (xullo, agosto e parte de setembro) amplíase e permanece aberta todos os días da semana. Galego, castelán, inglés e francés son os idiomas de atención e as súas funcións, ademais de ofrecer toda a información que os visitantes solicitan, tamén consisten en atender calquera cuestión práctica dos turistas, para lograr un alto grao de fidelidade cara á vila.

Ademais, dende a Oficina recórdase que o Castelo de La Concepción permanecerá aberto ao público ata finais de mes. O acceso é libre e os horarios son os seguintes: de mércores a domingo de 11 a 14 horas e de 17 a 19 horas. Así mesmo, o público pode participar en visitas guiadas gratuítas cada hora (ás 11,15 h, 12,15 e 13,15, así como ás 17,15 e 18,15 h).