A Embaixada española en México difundirá a riqueza termal ourensana

Reunión en México

O conselleiro Comercial da Embaixada de España en México, Francisco Garzón Morales, comprometeu “toda a axuda do corpo diplómatico español” na difusión da riqueza termal ourensana, tanto como eixe de desenvolvemento turístico coma na súa vertente empresarial. A Embaixada comprometeuse a vehiculizar toda a información que se puxo nas súas mans, dándoa a coñecer entre o empresariado e os axentes turísticos que regularmente acoden aos seus intercambios e plataformas en busca de oportunidades de negocio.

A delegación Ourensana reiterou ante os responsables económicos da Embaixada a mensaxe que se propuxeron difundir en México, tanto no relativo aos investimentos inmediatos nas Burgas e as zonas termais da marxe dereita do Miño, como o os futuros desenvolvementos e campañas turísticas que aborda a cidade.

Ante o conselleiro comercial, Francisco Garzón, e a agregada comercial, Rosa María Hontecillas, o alcalde e as concelleiras de Turismo e Cultura expuxeron os proxectos da cidade, que foron recollidos polo corpo diplomático co compromiso da súa difusión.

Pola súa parte, as representantes da CEO e o Poligono de San Cibrao, María Fernández e Yolanda López, depositaron a información relativa ás ofertas das empresas ourensanas, e intercambiaron información de cara á próxima realización de actividades de contacto empresarial nos sectores de alimentación, carrozados, automoción e outros campos industriais.

Finalmente, os representantes do corpo diplomático mostráronse sorprendidos pola oferta ourensana, que confesaron descoñecida en gran parte ata o momento, e reiteraron o seu ofrecemento de difusión e promoción dos nichos de negocio ourensanos.