Parada celebra a XX Semana Cultural do Centro Cultural e Deportivo Bolos da Carrasca

O Centro Cultural e Deportivo Bolos da Carrasca celebra esta semana a súa vixésima Semana Cultural, coa programación de actuacións de música e baile tradicional todos os días da semana. A primeira actuación será mañá a partir das 22.00 horas, e correrá a cargo do Grupo de Acordeóns Mascarenhas de A Guarda e o coro local Ecos do Castelo.

O martes será a quenda do grupo de gaitas Aires de Santes, o grupo de baile Froles do Galiñeiro e o de pandereteiras Froleada, estes últimos da Asociación de Veciños Galiñeiro, de Vincios; e o mércores o grupo de gaitas e percusión Xangal, da Asociación de Veciños de Cabral, e o grupo de baile moderno Marcando Pasos, de Nigrán. Os dous días as actuacións comezarán ás 22.00 horas.

Festa gastronómica

A vixésima edición da Semana Cultural de Parada pecharase coa III Festa do Ovo Frito con Chourizos, que terá lugar na contorna do centro cultural de Parada a partir das 22.00 horas, cun custo por ración de cinco euros. A velada estará amenizada polas actuacións dos grupos de pandeireteiras e gaitas Airiños do Sobreiro e Cores do Sobreiro, da asociación veciñal de Borreiros.