O padexeiro galego José Luis Bouza participará na proba mundialista en Diusburgo

José Luis Bouza

Os padexeiros galegos inician este xoves a súa participación no Mundial de Diusburgo (Alemaña) coas primeiras probas de clasificación. As catro xornadas da competición, ata o domingo, preséntanse intensas. Os barcos individuais e os dobres serán os primeiros en afrontar as regatas. Todos os padexeiros xa realizaron algúns adestramentos na pista alemá.

A ampla representación galega, que forman case a metade do equipo español, está liderada por Carlos Pérez Rial, ‘Perucho’, e Teresa Portela. Eles, pola súa veteranía, son os abandeirados dunha xeración de mozos deportistas que xa demostraron a súa valía no pasado Campionato de Europa disputado en Portugal. Case todos lograron entrar nas finais.

Óscar Carrera e Rodrigo Germade, dous dos compoñentes do K-4, transmiten boas sensacións. As progresións deportivas de ambas as dúas foron excelentes e afrontan a cita co desafío de sorprender os grandes favoritos. Din os técnicos que esta embarcación española é unha das que posúe máis proxección para o futuro.

Outros dos chamados a ser protagonistas poden ser Carlos Arévalo e Cristian Toro, dous especialistas no K-2 200 metros. Ambos os dous encóntranse nun bo momento de forma e o Mundial converteuse nunha cita moi importante esta tempada.

José Luis Bouza acode por sexta vez a unha proba mundialista. Busca a súa terceira medalla no C-1 1.000 metros. A súa experiencia e tamén o forte ritmo de adestramentos que realizou ao longo da tempada permítenlle buscar a final e intentar estar entre os primeiros. Eses son os seus desafíos.

O Mundial de Alemaña preséntase como un desafío para os padexeiros galegos. Varios deles teñen como principal característica a xuventude, un detalle destacado polos técnicos do equipo nacional.